Urigami d awal i d-yekkan seg tutlayt tajapunit. Yesdukel amyag [oru] = Ḍfes akked yisem [kami] = Akaɣeḍ. Zik, deg tmurt n Japun, ttinin-as i kra yellan d aḍfas : [Urikata neɣ Urigata ] = Taɣara n uḍfas. S tmaziɣt, nesmizeɣ awal ama deg tira ama deg ususru. Nerra [u] deg webdil n [o] acku asekkil ‘’o’’ ur yedda ara akked yilugan n tjerrumt n tutlayt-nneɣ mačči am usekkil ‘’P’’ yufa amḍiq-is . Asekkil ‘’o’’ ur d yemmezg ara akked usekkil ‘’u’’, yettḥaraf-it. Rnu i waya s, yessefk fell-aɣ ad ad nxemmem i usuddem n wawalen nniḍen ara neḥwiǧ sya ɣer sdat.
Akka ihi i as-d-nessumer isem n tẓuri-a s tmaziɣt : Urigami. D isem asuf ur yesɛa asggetasegget. Ma nsers-it deg waddad amaruz, ad t-naru akka : wurigami. Asmizzeɣ n yisem n tẓuri isashel-d aslugen-is. Seg neslugen isem n tẓuri, yeldi-d ubrid s asuddem n twacult n wawalen i neḥwaǧ, i yessefken ad ilin deg tutlayt-nneɣ. Nessuddem-d seg yisem n tẓuri-a isem n unaẓur : Amurigam / Tamurigamt. Amurigam d anaẓur n tẓuri n wurigami neɣ d ayen i umi nezmer ad nsemmi daɣen : Ameḍfas / Tameḍfast n ukaɣeḍ. Asegget-nsen akked umaruz-nsen d ilugnen.
Nettaru amalay akka : Amurigam (imurigamen) / Ameḍfas (imeḍfasen). Ma d unti-nsen d wa: Tamurigamt (timurigamin) / Tameḍfast (timeḍfasin). Ma nsers ismawen-a deg waddad amaruz ad ten-naru akka: Umurigam, (yimurigamen) / Umeḍfas (yimeḍfasen); Tmurigamt (tmurigamin) / Tmeḍfast, (tmeḍfasin).
Ad nger tamawt ɣef wawal-a ‘’aḍfas’’, d awal ur nelli d amaynut, neddem-it-id seg yiwet n tmeslayin n teqbaylit. Yetbet belli ttinin-t deg temnaḍt n yiɛekkuren. Yezmer ad yili ttinin-t deg temnaḍin nniḍen n tmurt n Leqbayel neɣ ahat yella ula deg tantalawin nniḍen n tutlayt-nneɣ.
