Guy de Maupassant : Tameẓla gar ileqman

Iweddeb-it waṭan n nnaqsa (''névralgie'') i yas-isewlellsen allen-is, yerna yesnulfa-yas-d amerɛun, ikemmel-as ''Syphilis,'' armi yuɣal yezzer di lweswas, yezga yettwali tamettant-is ; dɣa yeɛreḍ ad ineɣ iman-is weqbel ad t-tekcem tselbi d wekraf armi yemmut ass 06 Yulyu 1893. Yettwamḍel di tenḍelt n Montparnasse s tilin n yimeddukal-is, gar-asen Émile Zola.

 

 

MAUPASSANT, isebgen-d tidmi-s ; yebɣa ad yili d ilelli ibeɛden ɣef yikabaren isertanen, ibeɛden ɣef yiɣerbazen iseklanen d yiculen inuẓar (''courants artistiques''). Ɣas yettunebgat sɣur timetti tunnigt n tallit-is, iḥemmel agama, iḥemmel taywennit (''solitude''), iɣucc axaleḍ d wuḍan n zzhu n yinesbaɣuren. Yenna deg yiwet si tebṛatin-is :

Yettuneḥsab ɣur-s uḥulfu n teywennit d lmektub, di tedmi-s ur yumin tella leḥmala ger yemdanen ; wa ur ikeccem deg wul n wayeḍ, amsefhem gar-asen d awezɣi. Ayagi, yettban-d di tirawin-is s tmuɣli n layas alqayan ɣef tudert akked tmetti.

 

 

MAUPASSANT, yeɛǧeb-as aṭas Gustave Flaubert, ababat-is aseklan uɣur yelmed asekfel n tilawt s ttfaṣil, yeskad amaḍal i yaɣ-d-yezzin s tmeẓra-s, _ tucmitin d tucbiḥin _ yesɛa tamuɣli tuzzigt (''spécifique'') ɣef teẓrilawt (''réalisme'') akked teẓrigama (''naturalisme''), d win yettxemmimen s tekdit ɣef ugama ideg yettidir, ideg d-yekker, tid i wumi ur ifaq yiwen weqbel-is. Yella d amdan yettḥussun mačči d win yettḥulfun. Yeqqar :