Nizar Qebbani

Nizar Qebbani (s taɛrabt نـزار قـبـّانـي ) d amedyaz asuri, laṣel-is d aṭerki.. Ilul assn n 21 deg meɣres 1923 di Ssaɣur i d-yezgan di Dimacq, yemmut ass n 30 yebri 1998, di London, tamanaɣt tabriṭanit. D yiwen seg imedyazen iziten imeqqranen n tutlayt taɛrabt. Deg tudert-is yeɣra deg izerfan, maca yexdem d anmahal di tmura yemgaraden armi yeṭṭaxer deg useggas 1966. Yettwassen s tutlayt-is tasehlant i ifehhem yal yiwen ulamma s taɛrabt taseklant i yettaru ; maca ɣas akken, ccbaḥa n wawal-is d tugniwin yesseqdac d ayen ifazen akk ar assa, ladɣa m’ara ten-tiɣer yiwen s taɛrabt neɣ ad sen-tisel yettini-tent-id. Yebda yettaru seg wasmi yesɛa 16 isaggasen di leɛmer-is, syin mi yesɛa 21, deg useggas 1944, yessufeɣ-d ammud-is amezwaru iwumi isemma : Tenna-yi-d txemrit. Syin yerna-d aṭas n wammuden-iḍen d yedlisen n tesrit. Yuɣ lḥal aṭas icennayen i yeddmen isefra-s cnan-ten ama zik, am Ɛebd Lḥalim Ḥafeḍ deg taɣect “qari’at alf-finǧan” ; am d wid n tura am Majda Rrumi deg taɣect Kalimat( awalen).

Nizar Qebbani
Tameddurt
Talalit	Dimecq, 21 Meɣres 1923
Taɣlent	État de Damas (fr) État de Syrie (fr) République syrienne (fr) Tagduda Taserɣint Yeddukklen Surya
Lmut	London, 30 Yebrir 1998
Ideg n uẓekka	cimetière de Bab al-Saghir (fr)
Tamentilt n tmekkest	isragen igamanen (infarctus du myocarde (fr) )
Tawacult
Tissulya akked	Balq ՀՀis al-Rawi (en)
Atmaten-is d yissetma-s	Sabah Qabbani (fr)
Tiɣri
Alma mater	Faculty of Law Damascus University (en) 1945)
Tutlayin	Taɛrabt Taglizit Tafransist Taspenyult
Amahil
Amahil	amedyaz, diplomate (fr) , amaru d Amgawal
Taflest
Asɣan	Tineslemt
nizarq.com

Isental n Nizar Qebbani tezzin ugar ɣef tayri ideg yessen ad ifeṣṣel, maca iwet daɣen ɣef izerfan n tmeṭṭut segmi temmut uletma-s i yenɣan iman-is ; am akken yura ɣef tsertit d kra isental imestanen, dɣa yella yiwen usefru mucaɛen iwumi qqaren : Aɣrum d usebsi d wayyur i s-d-yessusen iɣeblan. « Asefru-ya di tilawt aṭas i t-yerran ɣer tutlayin-nsen seg wakken ameskar iwet-d deg-s s leqseḥ deg yir tikli i d-wwin Waɛraben d yimslelmen s umata i yeṭṭfen ala deg wansayen iqburen akken bɣun ilin, rnan zzin s uɛrur i tɣerma mi d-lhan ala d ddin. Asmi t-yura ssawḍen armi t-sbedden ɣer teɣdemt, yuɣ lḥal amedyaz-a yella icaɛ belli d arnaflas i yella ; ma deg uparlman n tmurt-is kkren-d ula d wid i d-yessutren ad s-kksen tiɣelnit tasurit (nationalité), maca ur teffiɣ ara akken. » Yenna :

« Anwa facal, neɣ anefsuy
I ɣ-izeddɣen yal ma teflali-d tafat
Imi tiẓerbiyin... d luluf n tqecwalin...
Lkisan n latay, d igerdan, zerɛen di tɣaltin
Di tmurt-iw
Anda ttrun wat nneyya
Ttẓallan
Zennun
Ttɛicen s lettkal
Segmi ttɛicen s lettkal
Rennun ssawalen i wayyur :
Ay ayyur,
A taɛwint n lwizz
D usebsi d yiḍes
Ay illu n rrxam iɛellqen
A taɣawsa ur nettwaman
Ili-yaɣ d agazu n lwizz deg Usammar
I imlyan n wid ur nettḥulfu s kra . »

Ayen yura

Ammuden

• Tenna-yi-d txemrit, 1944
• Temẓi n yif, 1948
• Samba, 1949
• Kemm inu,1950
• Isefra, 1956
• Taḥbibt-iw, 1961
• Unuɣ s wawalen, 1999
• Ussan n tmeṭṭut ur d-necliɛ di kra, 1968
• Isefra iweḥciyen, 1970
• Adlis n tayri, 1970
• Meyya tbratin n tayri, 1970
• Isefra yeffɣen i usaḍuf, 1972
• Ḥemmleɣ-kem, ḥemmleɣ-kem, ayen nniḍen ad d-yas, 1978
• I Beyrut tawtemt akked tayri-w, 1978
• Yal aseggas tezgiḍ d taḥbibt-iw, 1978
• Ad d-cehhdɣ belli ula d tameṭṭut, 1979
• Ussan uffiren n Baheyya tamaṣrit,1979
• Akka i ttaruɣ amezruy n tlawin, 1981
• Sin imawalen i imeɛcaq, 1981
• Asefru n Belqis, 1982
• Asefru ur iḥebbes ara ɣer tafat tazeggaɣt, 1985
• Tamedyezt yemxellen,1985
• Isefra iɣef feqɛen,198
• Ad d-tegri tayri a mass, 1987
• Tamkuẓt n warrac n yedɣaɣen, 1988
• Tiwriqin tuffirin n umeɛcuq aqermiṭi, 1988
• Temeddurt n yiwen useyyaf aɛrab, 1988
• Zwǧeɣ yid-m a tilelli, 19888
• Zzalamiḍ deg ufus-is, iwunak-nwen d lkaɣḍ, 1989
• Ala tayri i iɣelben, 1991
• Wiss ma tesliḍ-d i usṭeḥṭeḥ n lehmum-iw, 1991
• Lṭruf deg leṭruf, 1991
• Nekk d yiwen wrgaz, kemm d lɛerc n tlawin, 1994
• Xemsin snen d acekkeṛ deg tlawin, 1994
• Tid n Nizar ɣef ssḍa n tayri, 1995
• Agemmay n lyasmin, 1998

Taɣbalut Ablug n Samir Tighzert/Timuɣliwin