D acu i d aḍefs ?

Aḍefs s umata d izirig-nni iɣef ara tili tigawt n uḍfas neɣ d win akken ara d-yeǧǧ uḍefs mi ara yeldi. D aḥric-nni yettin ɣef yiman-is n ukaɣeḍ neɣ n ubeḥnuq… Yettak deg taggara i tɣawsa-nni tuzert tusligt amedya n yiḍefsen n tsebbaḥrut. Deg tẓuri n wurigami, iḍefsen merra yellan sɛan isem d wamek i yessefk ad ten-neḍfes. Aḍefs yezmer ad yili d aḥerfi amedya n uḍefs iɣzer neɣ adrar. Am wakken i yezmer ad yessegrew ugar n yiwen n uḍefs amedya n uḍefs Zad, yesɛa sin. Iḍefsen yesɛan ugar n yiwen, nettini-as aḍefs uddis. Yalla daɣen uḍefs uɣḍim, d win akken ara neḍfes sakin ad t-neldi. Yeǧǧaǧǧa-d izirig iɣef nettawi lewhi akken ad neḍfes iḍefsen nniḍen.

Mi ara tegrem tamawt, ad tafem llan yiḍefsen yewwin ismawen n uzamul i ten-id-yemmalen. Amedya n Za, d isem n uḍefs, d isem daɣen n uzamul i t-id-yemmalen. Ɣef way-a i nettwali iḍefsen, deg tẓuri n wurigami, amzun akken d iluɣma ara ken-iɛiwnen akken ad tecfum ɣef yizamulen. I waken ad tishil tɣuri n umeskan asunɣan, ad negzi iwenniten i d-iteddun yid-s, yessefk ad nissin ismawen akked wamek i d-iḍerru uḍfas n yakk iḍefsen yellan. Ttini-ak : Simmal nettales-d i tɣawsa, simmal nlemmed-d seg-s kra.