Ḥmed Umerri

Yiwen seg iserdasen n Fransa, isemma-yas « Robin des Bois n tmurt n leQbayel ». Iga tarbaɛt wiked igezzen iberdan i tkeryas , ger-asen yella Wasel ɛli. Dɣa d aneggaru0ya i t-izenzen i Fransa. Krim Belqasem, yewwet yewwet almi i yeqbel Umerri ad ittekki di l OAS, dɣa deg wussan-nni kan i ten-nɣan. Wasel ɛli-nni dɣa, yettwaṭef kra iseggasen di taẓult. Iserdasen n Fransa, budden-as s tkerkas almi i s-sekcem deg uqerru, belli tameṭṭut-is iẓer-itt Ḥmed Umerri. Si zɛaf akk d ukasan, yeqbel ad yeddu d Irumyen akken a sen-izenz Umerri. Umerri yemmut s temrigin (rṣaṣ) deg useggas 1947 deg iɛezzunen deg wexxam n ɛli Wasel

Tameddurt-is

Temẓi-s

Ilul Umerri di taddart At Jjimaɛ n temnaḍt n At Buaddu deg Iwaḍiyen. Ur ufiɣ ara anwa assegwass i deg ilul maca imi deg udlis n Useddiq inna-d d akken ikcem ar laɛeskar gar usegwass n 1937 d 1939 imi yufad-t-id ttrad amaḍlan wis-sin d aserdas di tnezruft. Imiren ɣur-es 20 isegwasen, nezmer ad nenni ihi d akken illul-d gar usegwas n 1917 d 1919.

Ass-mi illa d aqrur, itturar akw d tezyiwin-is di taddart uraren-nni n warrac n zik: tuqemca tufra, timqarqart, tiqqar, tebbib, atg. Yiwen wass, iṭṭef abrid iteddu s axxam, imlal-d ultma-s tettru, acebbub irwi war timeḥremt u isteqsa-tt: dacu i kem yuɣen? terra yas: d Aḥsen at I*... iyi-ewwten. Umerri xas d aqrur, xas akken meẓẓi u rqiq ɣef Aḥsen, ibarrez fell-as u ifka-yas tiyita s uqerruy isexnunes-it di tmurt. Limer ur as-tekkisen ara gar ifassen-is yelli atan ikkes-as ṛṛuḥ.

Tewweḍ ihi taluft ar tejmaɛt, baba-s n Aḥsen iggul ar d-yerr ttar ittwaksen ɣef mmi-s. Baba-s Umerri diɣen iggul kif-kif imi inna yasen di tejmaɛt ‘ihi ay tadart taluft tewweḍ ar tmegwḥal’. Maca imɣaren n taddart urzen-ten u rrant-ten-id s abrid dɣa teqqim kan akken taluft. D akud d tatut i tt-ifran. Maca xas ur meqqwert ara taluft-a gar twaculin n Ḥmed d tin n Aḥsen, tejja-yas-d i Ḥmed terzeg deg imi. Ahat imiren i igza d akken taɣdemt d tayett u win ur nesɛi tayett ad tt-yecc d taṣemmaḍt.

Baba-s Umerri d amɣid ixedmen tamurt am netta am medden di tallit-nni. Seg-mi id-illa umennuɣ-agi d Aḥsen, iteddu akw d baba-s ar llexla u ixeddem yid-s. Issassay-ed s axxam am argaz.

Amek iteddu kan iman-is

Xas akken ihi ṭaqa n wakud-is isɛedday-it di tferka ar yidis n baba-s, mi yufa kan cwiṭ n wakud i yiman-is ad inser ar teẓgi ad iḥewwes neɣ ad icali. Ad yekk akw ibardan d wezzu, isafen d ixarban n taddart acku iḥemmel ad eqqim iman-is. Ittaf iman-is mi ara yelli iman-is kan deg umadaɣ. Itxemmim aṭas. Aṭas n wid t-iẓran afus ɣef lḥenk icexc deg ilem. Mi ara yilli ihi iman-is, allaɣ-is itezzi am tẓarbuḍt. Win igan lmendad ɣef wamek illa di temẓi-s ad yaf ur imgarad ara ɣef wamek illa di temɣer. Izga di teẓgi u azday d waṭas n medden ur as essin tikli! Agwlaf ur as-yufi anamek!

Di Temɣaṛ

Idda ussegwass ɣef wayeḍ, imed aṭas Umerri. Tazmert am ulɣwem. Ccurent tuyat-is, nnernan ifassen d iɣalen-is, tebda-t-id tamart u taɣwect-is tuɣal tesharhur cwiṭ, zuret. Mi i t-iwala akken baba-s, inna yas yiwen wass mi itetten imensi: - A mmi! Bɣiɣ ad iyi tsaɛfeḍ ar ssuq n Buɣni. Yemma-s diɣen teddem awal u tenna-s - Yak a mmi tura kecc mmeqwreḍ u ula d nek bɣiɣ a k-id walin medden yerna ilaq ad txedmeḍ axxam tura! Umerri irra kan awal i baba-s: - Ur illi ayen ara dduɣ yid-k ar ssuq! Ur ccukeɣ ara illa kra i zemraɣ a t-xedmaɣ din di temdint! Maca tura akken i k-ihwa a baba! Atan ihi ad dduɣ yid-k azekka. - Atan ilha a mmi! Maca ur qqar ara ur yelli dacu ara texdmeḍ di temdint! Ilaq ad tessineḍ amek teddunt temsal di ssuq. Ad tlemdeḍ amek znuzun d wamek ttaɣen medden. Ad twaliḍ diɣen amek dren medden di temdint. Xarttum macci d yiwet i ɣef a t-fajj tiṭ-ik!

Azekka-nni di tafrara zrin ar ssuq n Buɣni. Dinna, ifka yas baba-s cwiṭ umesṛuf u msefhamen anda ara mlilen tameddit mi ara yefru ssuq. Umeri iddem abrid-is iteddu, ittemdeggar d imsewqen. Kan akka izga yas-d yiwen uterras anect-ilat deg ubrid u irra ad ittuɛeddi fell-as. Maca Umerri ur asent-ittanef ara i tigi. Iwesseɛ ifka-yas tiyita ar ibeṛdi. Ixmemmi din di tmurt uterras-nni amcum. Dɣa Umerri inser irwel ad iffer. Kra iḥedren din ssexcen ad feṛzen anwa-t akka uqcic-agi iṣṣemken aterras s yiwet n tyita? Yerna aterras-nni ittwasen di ssuq n Buɣni u ttagwaden-t medden. Di tallit-nni qqaren medden fella-s isɛa lhiba. Di taddart-is ttargigin medden mi ara t-walin.

Syin ikcem Umerri ar lqahwa, iswa ttay. Iṭṭef abrid-is ar yiwet n tḥanutt yuɣed laḥlawat d tẓidanin i watmaten-is (ɣur-es yiwen gma-s d yiwet n ultma-s) u idda ittrajju baba-s. Tameddit, mi-id-uɣalen, ur t-id yuli wawal ɣef umennuɣ-a di ṛṛehba n ssuq. D baba-s, ar imesni, id-immuchen i at wexxam ayen iwala di ssuq. Ḥmed irra iman-is am akken ur ḍrint: ur iḥdir ur iwala. Icca am netta am at wexxam bu-zelluf, imi akka igan wansayen n tmurt: ass amenzu ara yekcem uqcic ar ssuq, nefqen-d at wexxam u ttaɣen-d aqerruy n uzgar. Am akken ttagan-as tameɣra i win yuɣalen d amuqwran, d argaz! Ḥmed diɣen-netta issusem kan. Ibḍa tiẓidanin I watmaten-s akken ur sseqḍen ara, yuli ar taɛrict izzer di tnafa. Mi d-irfed baba-s awal ɣef umcciqlel-nni di ssuq, Ḥmed ikukra awal ɣef temsalt-a acku yugad imahat iwalla-t-id baba-s. Akken ad ikkes ccek d usurdu isteqsa baba-s: - Twallaḍ-t ihi uqcic-agi a baba? - Ur tris tiṭ-iw fell-as. Maca nnan di ssuq akken tazmert-is am ulɣwem, tuyat hraw-it, netta d awezlan cwiṭ. Diɣen d umsibrik n wudem, ahat iceggeḍ-as yiṭij tagwlimt.

Tura imi aglam neɣ udem d-ifka bab n Umerri ɣef uqcic-a tezga-yas-d i Ḥmed am tcacit, wisen ahat baba-s iẓra d mmi-s i d lefḥl xas ur t-id-inni ara. Ma d at taddart ttawin akw aqcic-a deg awal war ma ḥsan d mmi-s n taddart nsen.

Timlilit d Muḥend Areẓqi n PPA

Idda akken cwiṭ n wakud, Ḥmed izga iman-is kan. Ur iteddu d yiwen, ur isḍuqqut awal d yiwen. Ayen ilaq-en kan ayen nniḍen akw d ashetref. Izga di teẓgi d waylaten nsen di taddart. Ihi iɛya cwiṭ deg iman-is dɣa yiwen yiḍ inna i imawlan-is d akken ad iruḥ ar tamdint ad inadi amahil as d-iskecmen cwiṭ usurdi. Imawlan-is ddan-as kan di lebɣi. Azekka-nni di tefrara, ezzi abernus ɣef tuyat-is, icca-tt-id di Buɣni. Simi issers iḍaren-is di temdint yuzel ar lqahwa ad issu ttay. Issexc akw di medden acku iḥsa d akken wid izedɣen di temdint mgaraden cwiṭ ɣef wid id-yusan seg udrar. Imesdurar di temdint ttkukrun ula d tili nsen. Maca di tilawt iḥsa kif-kif-iten akw. Ites ihi ttay itmuqul di medden, dɣa immeslay i yiwen uqcic iqqimen iman-is diɣen ar tama-s: - Ak-selkaɣ lqahwa ay ameddakul? Aqcic-nni irra-yas-d awal: - Ur ttagwiɣ ara ay ameddakul! Dɣa mmeslayen akken cwiṭ anwa-k, ansi dd-kkiḍ, ansi d-usiḍ, almi d ewḍen ar taluft umahil. Inna yas Umerri aqli ara ttnadiɣ aɣrum-iw dagi. Aqcic-nni, Muḥend Areẓqi, irra yas: “ak awiɣ ad txedmeɣ ar xali di lkuca maca ɣur-ek dagi medden ssexdamen iẓawaliyen war ma fkan asen ayen id-ḥella tidi nsen. Illa zzur d lbaṭel”. Muḥend Areẓqi d aneɣmas n PPA (Akabar n Ugdud Azzayri n Messali Lḥajj) u tektiwin n tegrawla rrekemnt di tmelɣiɣt-is am ibawen di teccuyt. Fɣen ihi si lqehwa, uɣen abrid ar lkuca n Dda Ɛacur. Deg ubrid, awal ɣef medden d iqqeddacen iṛumyen izga ɣef yimi n Muḥend Areẓqi. Immel-yas-d akw amek ttwasknan yergazen di Buɣni, amek ttwaṛzan kra n wid d-yuli wawal ɣef war-tiɣdemt d miḥyaf.

Ixdem akken ihi Umerri kra n wussan ar Dda Ɛacur di Buɣni, ar xali-s n Muḥend Areẓqi, u yiwen wass ikker yurag ar Umecras ad icali cwiṭ. Lqahwa tamezwarut i iwala ikcem ɣur-es. Yufa din Muḥend Areẓqi isekkef ttay. Swan akken-nni yiwet n tɣellayt, qeṣren cwiṭ. Muḥend Areẓqi imiren yuki d nnda mi tekkat u awal asertan izga deg imi-s. Ikkat di Lqayed d Ccambiṭ d wid akw itetten deg fus uṛumi d wid iɛefsen aẓawali d ugellil. Xas akken, Umerri ur icekcem ara aɣbwel i temsal-a, iɣil d tiqwulhatin n wid izedɣen di temdint. D tawat kan d wayen txeddem wanag win illuẓen ilha kan d uɣrum-is. Yerna kra d-inna Muḥend Areẓqi inna-yas-t-id yagi di Buɣni ass-mi mlalen tikkelt tamenzut. Umerri itett-it kan s wallen ittecmumux. Inna deg ul-is : aqcic-a yuɣ-itent! Yerna am tfunast ittara di llifeẓ!

Iffeɣ-d ihi si lqahwa-nni u imlal-d Ccambiṭ bu uɛekkwaz ɣef umnar n tewwurt. Ccambiṭ, abernus azegzaw ittejgugul ɣef uzagur-is d ukras n unyir, ittwassen deg Umecras d yir sekka imi iḥeqqer medden u izga isrusuy d tirect kra n win ur nezmir ad yerr tiyita. Irna medden s tmerna n tfunast akken qqaren at zik. Ula d tineggura yagi akken ad issusem uqcic iccebwlen imawlan-is qqaren-as: "ssusem ad t-aya Ccambiṭ!" Dɣa aqcic ad ikmumes di tesga ad irked. Yuɣal ihi Ccambiṭ d aberaɛruɛ neɣ ugar: d amaɛmuc! Immeɣ Ccambiṭ ihi iṣṣemek Umerri s uɛekkwaz. Umerri inkaḥ amzun d aqjun ittewten, imzaraz. Ikker, izdi lqed-is u ifka yas tiyita ar tgeẓẓal d tayeḍ ar umayeg u Ccambiṭ icca-tt-id deg ubaluz ittnazaɛ. Itti iman-is am llufan. Ixnunes. Iɣli wanza-s ɣef umnar!

Umerri irwel, yuzel u yuɣal ar Buɣni s tufra. D yiwen b-ukamyun i t-iselken imi ɣef tiṭ-is kra d-iḍran gar-as d CCambiṭ. Mi ewweḍ ar Buɣni, xas akken izwar-it wawal n wayen d-iḍran deg Umecras yuzel ar lkuca ad iddem lqec-is. Ur inni awal i Dda Ɛacur xas akken wagi isla, iẓra ayen iḍran. Yerna bu-lkuca, udem ur as fkin ara, ur isetḥa ur iwwura: simi tefka tewwurt Umerri issaweḍ awal i yemsulṭa. Akka i d tagmatt n wid isuzuren udem!

Iffeɣ si lkuca, iṭṭef rif-rif n ubrid almi d ijufar d Buɣni. Tiṭ-is ɣef ubrid ukarrus ittmuqul ma illa win ara t-yawin ar Tizi. Akken kan ihi atan iteddu-d yiwen ukamyun, izwer-as ar ubrid Umerri ittwehi-yas ad iḥbess s sin iffasen. Iḥbes ukamyun, msefhamen ɣef ssuma akken ad iddu yid-s ar Tizi u irkeb ar deffir.Umerri inna-yas nek d Saɛid, Saɛid Waɛmer. Bab-ukamyun irra yas “ atan a Saɛid ma illa win iɣ-d iḥebsen kecc d axeddam-iw”. Akken dɣa id-teḍra, ar tewwurt n Tizi Uzzu, ttwaḥebsen, Umerri d axeddam n bu-kamyun u isɛedda taswiɛt akken. Ula d netta s timad-is, mi-d fɣen cwiṭ i Buɣni, is-teqsa-t-id yiwen seg ijjadarmiyen i wumi ssaweḍ Dda Ɛacur awal, ma iwala neɣ essen Ḥmed Umerri. Umerri irra iman-is ɛit-ɛit.

Timlilit d Saɛid Waɛmer di Tizi Wezzu

Di Tizi wezzu, imi mazal ttnadin fell-as yemsulṭa iṛumyen d iɣallen nsen gar Iqbayliyen, ijja kan isem-nni n Saɛid Waɛmer akken ad ifer yis. Yufa-d amahil ar yiwen Uṛumi mi ssawalen Jean. Jean isedday di Tizi yiwet n taṛmist n uxnac u isexdem Umerri akken as tt-ittɛasa. D amahil fessusen i umesdrar. Umerri am zik-is kan. Ur sḍuqqut awal, ur isɛi imeddukal. Ula d ucci d wid itefɣen is-t-id-ittawin si berra. Ula d Arrumi-nni akeswaḥ isker-s aɣwbel u isteqsa-t yiwen wass: - A Ssaɛid, carhaɣ s uxeddim-ik. Xas macci aṭas i tettaxeḍ dagi ɣur-i maca s iɣallen-ik d tidi-k i ten-id-ssasayeḍ. Maca tella yiwet ur iyi-t-kcim ara s aqerruy. Amek alami ur tettefɣeḍ ur tettmeslayeḍ aṭas d yiwen ur tesɛiḍ kra n imeddukal? - Qqim kan a mass Jean, iweṣṣa-yi baba ɣef tikli d udukkel d medden. Inna-yi win ibɣan ad yecc aɣrum-is di talwit, ad iṭṭixer i medden d tkerkas nsen. Yerna nek d mmis n udrar u tkli teddun medden di temdint ur teffiɣ fell-i. - Baba-k d amusnaw. Atan ihi imi d yagi kan am akken ur ḍrint! Ihi Jean ayen wallant wallen-is d ayen illan. Acku "Saɛid Waɛmer" macci kan iweṣṣat baba-s, tweṣṣat ula d tudart d wayen iwala yagi. Ur as-tefki ara tegwnitt ad iffeɣ. Yugad ad t-kkarcen u ad t-hawṣen ar taẓult.

Nneflen kra n wussan ɣef wiyaḍ, izri kra n wakud d Ḥmed illa di teglimt n "Ssaɛid Waɛmer". Ixxeddem u ilha kan d yiman-ines. Irked kan iffer. Yiwen wass ibed ɣef umnar n lluzin isla i yisem-is sanwi is-d-issawlen: wa! Ḥmed! Waaa! Ḥmmed Umerri!. Ifrawes anwa i t-isnen s yisem-is n tidett. Iɣil sanwi i t-id iɛeqlen. Irfed allen-is iwala Mḥend, ɛemmi-s. Iwehha yas yusa-d ɣur-es u iḥka yas akw ayen illan. Ɛemmi-s agi ewwi-yas-d akw issalen n uxxam nsen d wid n taddart. Inna-yas-d yiwen yiwen amek llan at taddart u issaweḍ-as-d diɣen awal d akken sawlen-as-d ɣer lɛesker. D ijjadarmiyen is-ewwin lekwaɣed s axxam. Inna-yas d akken ilaq ad iruḥ Umerri ar ijjadarmiyen akken ad t-awin ar "Maison-Carrée", Lḥerrac n wass-a. Azekka-nni ifka yas taḥawact issurdiyen Umerri i ɛemmi-s iweṣṣat a tt-ifek i baba-s yerna ad as yenni "aqli-yin ussan-a s axxam". Isseda-yas awal akken ur iqqar i medden taluft n Saɛid Waɛmer is-d-iḥka iḍelli-nni akken ur skaren ara aɣwbel deg uxxam yerna ur ilaq ara ad tettawin medden d awal s yir iles.

Aserdas

Send ad iffeɣ a d-yuɣal s axxam ɛemmis Mḥand, Umerri yurag ad iwali Jean akken as-yinni d akken ad iḥbes amahil imi issufek fell-as, am netta am tezyiwin-is, ad iruḥ ad isɛeddi lɛeskar. Ira ihi ad iṭṭef tajarnanti-is imiren imiren akken ad ifek cwiṭ n idrimen s axxam. - Mass Jean, ass-a ak jjaɣ imi ssawelen-iyi-d ar lɛeskar. D ɛemmi Mḥnad iyi-d-innan ulin ijjadarmiyen ar taddart. - Tezriḍ a Ssaɛid, seg ass-mi txedmeḍ ɣur-i ur ak-d-kkisaɣ. Atan ak-xelsaɣ akw agur-a xas akka ur ikfi ara. Atan ihi, ssarameɣ-ak ayen ilhan ar zdat.

Umerri iffeɣ akw d ɛemmis, yuɣ-d cwiṭ icettiḍen s axxam irna ifka yas i Mḥand kra iṣurdiyen ad ten-yawi i baba-s. Iweṣṣat ur iqqar i yiwen ɣef temsalt n Ssaɛid Waɛmer. Mḥand yuli s axxam, Ḥmed iṣṣub ar ijjadarmiyen. Azekka-nni icca-tt-id di Maison Carrée (Lḥerrac n wassa) deg ijufar n Lzzayer (tamaneɣt n wassa) yuɣal d aserdas gar tezyiwin-is.

Gar iserdasen ewwi-d iman-is: iḥrec, iẓwer, imɛen. Xas akken di tezwara ur iḥemmel ara talaba userdas, kra n wussan kan yuɣal innum-itt. Tekkes-as akw tilluxa d usras n yiman-is izgan ɣef kra n Iqbayliyen imiren. Yufa Ḥmed iman-is. Iserdasen nniḍen mi i-t-walan akken icṭar, ran akw ad ilin ar tama-s, ad uɣalen d imeddukal-is. Maca netta, am zik-is kan, ulac tadukli, ulac awal. Maca ahat ur iḥwajj ara tadukli isardasen imi yufa iman-is gar ibeckiḍen d tmegwḥal. Iḥemmel aɛbar d rriḥa n dduxan d-tefɣen mi ara iffeɣ ukaṛtuc. Isbedday tibṛiqin di nnican, ittara znad u ikkat-itent. Imir at tafeḍ izmumeg ifraḥ. Ilmed amek iteddun leslaḥ, amek ara ifsi timgwḥal d tmeẓyanin. Ilmed diɣen tamusni n tserdest, amek ara innaɣ, amek ara iffer d wamek ara issexdem tigwnatin n leḥris akken ad isselek iman-is. Anect-agi akw ilmed Umerri ad t-yaf deg ussan i t-ttrajjun ar zdat.

Tin ɣer-s, imi atan yuɣal d aserdas, iwala d akken yuɣal s abrid. Ikcem ar tegrurt. Yiwen ur ittnadi fell-as tura. Ur iteffer ur t-id-ifki. Izdi lqed-is u irfed aqerruy-is. Yufa iman-is. D laman. Zrin 12 n waguren, ewwi-d ula d ttesriḥ. Serḥen-as-d s axxam snat n ddurtin. Yusa-d iɛawen baba-s deg umahil d userwet di tfarkiwin nsen. Ikkes aɣwbel i yemma-s u issefraḥ atmaten-is. Iḥewwes diɣen cwiṭ di taddart d imudaɣ-is akken ad d-immekti temẓi. Zrin wussan am ifeṭṭiwej almi d-yufi iman-is eqqim-as yiwen wass. Innuɣna. Azekka-nni ikker zik ad iruḥ. Tedda yid-es yemma-s almi d taqerniḍt n taddart-is, tuɣal-ed s imeṭṭi d tasa-s n tyemmatt temmecc.

Ṭṭrad amaḍlan wis-sin

Kra n wussan mi-yuɣal ar lkazerna n Maison Carrée, fkan-t ar tnezruft. Din tusa-yas-d semmumet imi ur innum aṭas n uzɣal d ujdi. Iṭij irna aceggeḍ i wayen iqqimen i tegwlimt-is. Maca Umerri akken is-d-usa tegwnitt iqqazem-itt. Irfed-tent issers-itent yufa-d yifit tanezruft d talwit wala ccwal n tudart gar medden di tmurt-is. Deg usegwass n 1939, ikker uhetwil di Turuft. D ttrad amaḍlan wis-sin. Sbegsen-asen Iṛumyen i waṭas n warrac n tmurt akken ad rḥun ar Fransa ad ḥerben ɣef tlisa n tmurt. Hitler icca-d tamurt sya-u-sya. Dɣa Umerri illa gar wid ibegsen iḥezmen , war lebɣi nsen, ad rren akk-in iserdasen n Hitler di tama n Strasbourg ar tiseɣlit Maginot. Maca Wehrmacht tekka-d s ufella, s tmurt n Beljik. Akka isen ikellex Hitler i Ṛumyen d Igliziyen. Mugren-t ar usammer n Fransa u ewwin kra sɛan d aserdas iẓewren ar din u jjan amalu d ilem. Dɣa kra i ɣef izḍem Hitler ini isdarm-it, ihud-it, imeḥqit.

Xas akken, mbarrazen Iṛumyen d llalmaniyen deg usammer n Fransa, di tama n Strasbourg. Dinna dɣa i illa Umerri gar isardasen Iqabyliyen. Atan amek iḍra umbarrez-agi: ɣzen ixejjḍan d tesrafin sdat nsen, heggan iman-nsen ad nnaɣen. Iḍudan ɣef zznad. Umerri iqqim, tamegwḥelt tres ɣef umessaḍ, tixenfyac ar igenni d MAS 36 ar tama-s. Allen-is ṛessant ar tama ucengu ittrajju am netta am isardasen nniḍen. Mi d-iwwed userdas allman, ibda-d aṛsas aṣeffer sya-u-sya, isla Umerri i ccaf nsen isuɣ: ar deffir! ar deffir! Rewlen akw Iṛumyen d wid illan ar tama nsen acku ḥsan ur zmiren ara i Inaẓiyen ten-yugaren ten-yifen ama di leslaḥ ama deg uheggi n ttrad. Dɣa yufad iman-is Umerri iman-is kan, weḥdes acku ur iddi ara gar wid irewlen. Ur yuɣal ara ar deffir am netta am wiyaḍ. Mi d-iwweḍ ihi tizi leḥris ulac amwanes, ulac ameddakul. Yiwen ur d-illi ar tama-s. Maca rrewlen akw ala netta. Ayen? ayen ur irwil ara am netta am isardasen nniḍen? Amek almi niqqal ifka ixef-is d asfel? Dacu i t-ijjan iqqim din? Wisen dacu id-iɛeddan deg uqerruy-is almi inta din am tagwest d ṛsas d acebṛuti ittreqriq deg igenni. Iseqsiyen-agi ahat mmuten yid-es. Maca limer d-illi unadi ɣef tudart-is ahat atan neẓra ayen iqqim ddaw ikamyunen d tkeryas illmaniyen.

Ikcem ar tesraft neɣ ur uxmujj ittwaɣzen ddaw tmurt irked din. Idda cwiṭ deg-s imi axmujj-agi ɣezzif almi iwala iman-s iffer akken iwulem issusem iqqim iman-is. Ur t-id-yuli wawal ur t-id-yuli umesli. Inteḍ din amzun d tadɣaɣatt. ɣef ubrid nnig tmurt, nnig uqerruy-is, ttɛeddin icaren d ikamyunen n Wehrmacht. D zhir kan i wumi issel d tmurt ittenhuzun fell-as. Tikwal ɣellin-d kra n ibruyen n wakal si sqqef n tesraft-nni. Iɣil ad d-hud u ad ittwarkeḍ din yerna yiwen ur t-ittaf. Ad iruḥ am aḍu. Maca, am arezg-is, isemnaɛ aqerruy-is.

Timlilit ines di Fransa d Muḥend Aṛezqi

Mi iẓra d ayen tefra nnig uqerruy-is, zrin iserdasen n Wehrmacht. Irjja iḍ iffeɣ-d. Yuzel ar teẓgi iffer d netta i ttwali sya-u-sya ma illa kra ara iwali. Idda akken cwiṭ iwala yiwen laɛzib neɣ lfirma. Iɛuss-itt cwiṭ ad iwali amek tella tegwnitt din, ur iẓri wara n wayen issagwaden. Dɣa yemmeɣ s uɣiwel iteddu s axxam-nni ibedden ar rrif n tfarka gar snat n tselnin. Isṭebṭeb, telli yas-d tawwurt yiwet n tmeṭṭut meqqwert cwiṭ di laɛmer. Inna yas ayen illan, tameṭṭut tefka-yas icca iswa. Tefka yas diɣen talaba n urgaz-is akken ad ikkes talaba-s userdas. Syin iṭṭef abrid-is ar tmaneɣt, ar Lpari. Di Lpari, di Barbes, imlal d Muḥend Aṛezqi deg yiwet risṭura i deg iqqim i uḍebsi n seksu. Dɣa zedɣen akk-en akken ad myaḥkun ɣef uqbur d umaynut. Immuceh-as-d Muḥend Aṛezqi amek teṭṭfen ar taẓult ass-mi isres Umerri d tirect Ccambiṭ deg Umecras. Ittwaḥbes agur, iffeɣ-d. Syin iṭṭef-d lbabur ar Fransa maca di ljjib-is ur tettekkes ara Colt 45 ines. Izga ar ɣur-es acku imiren teqwa tmafyatt di Lpari. Umerri diɣen ɣur-es di tbarizt, MAS 36 ifsi, d yiwen ujenwi anect-ilat, inebbeh-it u taqamumt-is tesɛa uglan d tuɛlac am umgar.

Inuda yufa amahil dɣa irked am netta am iminigen n tmurt: lxedma lluzin s axxam am aken qqaren iminigen n zik! ɣer yimsulta n Fransa Umerri, imi ur t-ufin ara yuɣal d amerwal, d amẓerti. Yuɣal diɣen ar temsalt-nni n tuqemca tufra. Maca tin i t-ideggren ar tufra d tin ssalima. Iddukel netta d Muḥend Aẓezqi ad walin asaru akken ad ksen cwiṭ ɣef ul. Di ssalima, send ad ibdu usaru sɛeddan-d yiwen usaru awezlan ɣef imezdaɣ n ugafa n Tferka yunagen ar Fransa, imiren wa iqqar-asen Aɛraben wa iqqar asen kan Inselmen. Deg usaru yagi izga yiwen ubulis, bu-tkaskiḍt, ishetrif , itezzem, ikkat deg Imaziɣen d Waɛraben. Xarttum miḥyaf d usider deg imaziɣen almi ur asen- ijji yiwet. Mi walan akken Umerri d Muḥend Aṛezqi, ijbed-d Muḥ Aṛezqi tameẓyant itirri ɣef ubulis-nni deg usaru deg akken irfa, immec. Dɣa tekker ṭanṭana, ikker uhetwil. Wa ittsuɣu, wa ittmejjid, wa yettazal wa yeffer ddaw ikwersiyen. Umerri d Muḥ zṛan dacu i ten-ittrajjun rewlen send ar lemdent tewwura, send ad d-awḍen ibulisen.

Seg imiren, imsulta ḥsan deg akken Umerri idder. Ibda unadi fell-asen netta d Muḥend Aṛezqi. Rekden deg yiwen usensu di Pigalle iṭṭef yiwen uqbayli. Qqimen ugar n 4 wussan ur d-ffiɣen deg ass. D iḍ kan iten iteṣren, tefɣen leḥḥun cwiṭ ad ksen lxiq. Ar wass wis 5, Muḥend Aṛezqi yeḥḥulejj (idisidi) ad yuɣal ar tmurt, inna i Umerri: - Ur ak-id nniɣ ara maca atan ara ttnadin fell-i yimsulta acku ugiɣ ad dduɣ ar umennuɣ mgal Ilmaniyen. Yerna atan ad ruḥeɣ ar tmurt. - Ayen? Tugadeḍ ? Yerna Hitler iḥqer-aɣ. - Ala macci ugadaɣ. Ur bɣiɣ ad nnaɣeɣ akken ad d-ḥelliɣ tilelli i Iṛumyen d nutni ugin iyi tilleli di tmurt-iw. Amek ara zzlaɣ ad fkaɣ iman-iw d asfel akken ad ḥelliɣ tamurt i Iṛumyen d tmurt-iw tedder ddaw uḍar nsen. Ini-yi-d amek ma illa kra n ṣṣwab nniḍen ɣur-ek? - Dacu ara ak iniɣ a Mu! ɣur-ek kra n tektiwin ur llint ara ɣur-i. Maca imi telliḍ akken ik-ihwa dagi ur ttuɣal ara ar lmizirya n tmurt. D aya kan ara ak-iniɣ! - Ma illa ewwi-k-id ubrid yiwen wass ar Buɣni, ɛeddi-d fell-i ad nemwali. Ma d ayen nniḍen ifra ssuq tenza sselɛa.

Temlal tasa d wayen turew

Seg wass-mi iruḥ Muḥend Aṛezqi, yufa-d Umerri iman-is iman-is kan i tikkelt nniḍen. Maca tiktiwin n Muḥend Aṛezqi bdant ttakkent imɣi deg allaɣ-is. Izga ittxemmim ɣef anect-a. Izemmem ixemmem, yufa d akken d Muḥend Aṛezqi u ɣur-tella tidett. Tamurt-is tettwaḥres, issekna-tt Uṛumi d alqayed d ccambit ar yidis-is. Imiren ttrad amḍlan diɣen irekkem. Wehrmacht tezgel kra imennuɣen u tebda tettnaɣ timedeffirt. Umerri icum-itt tebda tqemmeḍ. Acku Iṛumyen d Igliziyen ttqejjimen cwiṭ cwiṭ deg Inaziyen ittnaɣen s tukerda n tqejjirt. Izra d aken ar tagara n ttrad, ad tedyeq fell-as tegwnitt. Imi ad uɣalen ad ezzin fell-as yemsulta. Dɣa, 3 waguren send ad ifru ttrad, iṭṭef lbabur ar tmurt.

Mi d-ires di Lzzayer, iṭṭef imiren imiren lkar ar Tizi Wezzu. Mi tfujj tiṭ-is ɣef idurar i deg id-ikker, ireḍb-ed wul-is u tberreq tɛabuḍt-is. Iḥus am akken iqber cwiṭ maca macci d aqber-nni d-zeggwiren amɛuqu. Irkeb deg yiwen uṭaksi almi d Tizi n Ttlata ikemmel deg iḍ uṭṭellis ɣef uḍar almi d axxam. Iteddu ittemdarkal, ikkat tiselnin d yeẓra almi issaweḍ ar taddart-is iṭṭsen, amzun d tilemt. Iddem abrid s axxam nsen isṭebṭeb ɣef tewwurt useqqif. D tawwurt n ubelluḍ d tahrawant. - Anwa wa? id-inṭeq baba-s. - D nek a baba! D Ḥmed! Ldi-yin tawwurt! Teldi-d tewwurt, kkren-d akw at wexxam mugrent-id, ssudnen-t. Yemma tessaɣ times u ikker ubahnanuz ittaweḍ ar ssqef. Qqimen akw yid-es ar yiri lkanun iḥka yasen-d amek teḍra yid-s. Deg uxxam yufa-d baba-d meqqwer cwiṭ maca ur yuɣal ara d amɣar awessur am aken iɣil ad t-id-yaf. Yemma-s kif-kif teṭṭef ula d nettat iman-is. Gma-s meqqwer s tezmart-is ma d uletma-s ur tt-id-yufi ara deg uxxam. Attan deg uxxam-is, “fkan-tt” tezwejj.

lḥasun kra ikka yiḍ, teqqim tumart d teḍsa ulac anwa ara tent-idmen. Carhen wulawen, ikkes uɣilif d lxiq: yuɣal-ed urgaz s axxam. Azekka-nni at taddart akw mgagin-d ar ɣur-es di tejmaɛt imi cedhant, jjment akw. Tilawin kecment-ed s axxam s waddud. Ta tewwi-d timellalin, ta d timẓin. Ta d skkwer ta lqahwa acku akka i d ansayen imiren. Mi ara d-yuɣal iminig ttadedden-d medden ɣur-es u ssarbaḥen i mawalen tuɣalin-a n talwit. Qqarent tlawin i yima-s "meqqar imi d-yusa bxir mmi-m!" neɣ "Ansuf s mmi-m ar wexxam, s tezmert-is! Yerna ur tyuɣ wara a negehh-im!" llant tid diɣen is-innan: "Ma nniɣ-am! Awid-ukan yuɣal-ed irza-d fell-awen! Lɛeslama-s!"

Sin wussan ar yidis imawlan d at taddart, iṭṭef abrid ar Yiɣil Imula ad iwali ameddakul-is aqbur Muḥ Aṛezqi. Yufat di yir tagwnitt. Inna-yas-d: - Atan ara ttnadin fell-i di myal tama. Serḥen-d iṭṭarusen nsen fell-i u ssegdeln-iyi tufɣa gar medden. Ilaq-ak ur d-ttaseḍ ara aṭas ɣur-i akken ur ak-d-ttawiɣ ara daɛwessu neɣ kra twaɣit nniḍen. - Waqil ur iyi tessineḍ ara ar tura a Muḥ a gma! Kecc d ameddakul-iw, yerna ala kecc i d ameddakul-iw u nek ur ttajjaɣ ara imeddukkal di ddiq. Urjjin ak zziɣ s waɛrur ttnadin fell-ak neɣ qqimen! Dulaqrar ad tifrir tagut!

Qqimen akken di sin tiremt. Mmeslayen akw ɣef ayen iḍerrun di tmurt d wayen iḍran di Fransa. Muḥend Aṛezqi tikkelt-a iwala d akken Umerri ifka-d udem i wawal asertan d-ewwi s lecwar kan. Icrah s umeddakul-is. Icrah ugar imi Umerri ur yugad ara ad t-imlil gar medden. Ugar anect-a iɛreḍ-it-id s axxam-is akw-ya.

Yuɣal-d Ḥmed ar taddart anda iqqim kra n waguren. Ussan ttazalen d wudem nsen yiwen. Yufa-d iman-is am zik: iman-is deg imudaɣ n taddart. Tudart n taddart ur teffiɣ ara fell-as. Macci tikkelt-a allaɣ-is itezzi, ittxemmim ɣef teɣdemt d miḥyaf ddren Iqbayliyen di tmurt nsen. Awal n Muḥend Aṛezqi isṭenṭun deg uqerruy-is. Yerna iwala d akken uɣalen medden macci kan di ṭṭarf, maca ula d illugan m tmurt n Iqbayliyen aṭas ur ten-nettqadar ara imi illugan Iṛumyen kkan-d nnig-sen. Irra umeḥras taqlaḍt i Uqbayli izzuɣur deg-s am... Yufa diɣen aṭas n miḥyaf d lbaṭel i illan gar medden. Ameqwran icca amecṭuḥ. Amerkanti issexdem s wulac aẓawali, icca tidi-s. Wid inetḍen ar Iṛumyen am lqayed d ccambit rekḍen atmaten-is deg zal qayli. Tuɣal tirrugza d awal kan, tuɣal tirrugza d idrimen. Umerri icca-t wuli-s ɣef wayen iwala. Ur innum ara tigi. Iɣuc-itent. Iɣunfa-tent. Dɣa seg-mi d-erna tyita n Gelma di 8 di magu ussegwass n 1945 igza ur d-iqqim wara. Ittwakkes sser u Aṛumi ibeggen-d udem-is amek-it. Yuɣal-as Uṛumi d ixwumasen-is d qeḍran. Sya d afella, nek yid-sen d taqbaylit! 12 di magu 1946, irzef Muḥend Aṛezqi ar Umerri. Iwwin-d ameslay ɣef issalen n tmurt s teɣzi s tehri. Imiren i issali Umerri tamuɣli-s ɣef wayen is-d ezzin. Tewweḍ tfidi s iɣes. Inna-yas I Muḥend Aṛezqi iwweḍ-d lawan ay ameddakkul! Ulamek ara a nidir akka. Ad nali s adrar u nessekrah ddunit i wigi ittbargizen fell-aneɣ d wid isen-ittaṭafen afus. Msefhamen d akken ala tufɣa ar udrar i d tifrat. Msefhamen diɣen d sin kan ara fɣen d yiwen neɣ sin imeddukal n Muḥ Aṛezqi. Ad ddun yiwet n tikli u d Umerri ara yilin d aqerruy n terbaɛt. Umerri iffeɣ-d takeṛmust-is imir imir: - Win yugin ad yaɣ awal-iw di terbaɛt-agi nneɣ atan ad ibnu fell-as! Ma d ayen nniḍen, simmal cwiṭ yidneɣ simmal ad tifsus fell-aneɣ tufɣa d tufra. Ma d ayen nniḍen ad iniɣ: effer, ewwet acengu anda ur k-yuḥtam. A necfu ɣef wawal-agi a t-nɛelleq am fzim! Inna yas Muḥ Aṛezqi ak mlilaɣ ar lagar n Mɛetqas ass n lexmis id-iteddun.

Ilul-d Umerri

Ass n lexmis, iruḥ Umerri as Mɛetqas zik. Ezzi-d yakw i imeḍqan i wanida ara imlil d Ḥajj Ali Muḥend Aṛezqi d imeddukal-is. Netta iṭṭef deg uqerruy-is kra is-d-inna Muḥ Aṛezqi ɣef umdiq-agi. Inuda fell-as yufa-t deg umadaɣ. Umerri ur ittamen yiwen. Iẓra ma illa win is-tt-yundin ad ittwaṭṭef am arruy di lɣar. D aya i ɣef izwar. Ad iwali dacu-tt akka takwatt-agi n Muḥ Aṛezqi d wamek ara ikcem ɣur-es d wakem ara d-iffeɣ seg-s. Mi ifka anadi d wannuy deg-s, issens tacemmaɛt ittezruruqen deg teɣwmert n tekwatt; iffeɣ iffer ittrajju ad d-awḍen wid akken i deg ara yaɣ abrid umadaɣ.

Mi iɣli yiṭij, aten-iyi teddun-d 4 iterrassen. Mi id-ssawḍen ar yimi n tekwatt iffeɣ-d Umerri deffir-sen inna yasen: - Aql-i d a Muḥ Aṛezqi! Beddet din aqli-yin ɣur-wen. Muḥ Aṛezqi d imeddukal-is frawsen. Isduqqes-iten-id Umerri ur tuḥtamen. Mi d-iwweḍ ɣur-sen inna yas Muḥ Aṛezqi: - Ahya a Ḥmed a gma! Amek akka d-tufiḍ amḍiq-a yak a mmi ilaq ad n-ɛeddiɣ fell-ak ar lagar n Mɛetqas ɣef 8. Attan d 7 d kecc tmugerḍ-iyi-d ar tekwatt-iw! - D kecc iyi-d innan amek ara a d-aseɣ ar da xas akken ur tukiḍ ara d yiman-ik. Tenniḍ si lagar a nezgar abrid n tmacint, a nsub s asif syin a neddu deg umadaɣ almi d kra n tḥeccaḍin...Akka ihi id-ufiɣ abrid-iw. Yak amadaɣ ur isɛi ɣur-i kra n tufriwin. Ma tenniḍ-as i llufan ayen iyi-d-nniḍ, ad issiweḍ ar da zdat-ek! Maca macci d aya i ɣef d-ewwid irgazen-agi, kecmet tura akken a nemyusan cwiṭ, a nebbeh abrid ara naɣ ar zdat.

Kecmen ar tekwatt. Warɛad ssarsen iman nsen inna yasen Muḥ Aṛezqi: - Ay atmaten, akken a nemyusan cwiṭ, myal yiwen deg-neɣ aɣ-d-yini anwat d wacu i t-id issawḍen ar da, ar gar-aneɣ. Nek s timad-iw qqaren-iyi Ḥajj Ali Muḥend Aṛezqi n Iɣil Imula. Muggraɣ d tsertit si temẓi. Lliɣ d ameɣnas n PPA maca tagara yagi yuɣal ukabar n Ugdud Azzayri d inan kan, d awal kan. Xas akken, aɣref izga ibezzer idrimen i ukabar yerna seg uksum-is iten-id-itekkes. Llan wid diɣen iten-id-issuksen i uɣrum n warrraw nsen akken ad gren afus. Maca iqerray n ukabar ɣilen d Rrebbi asen-tt-id yawin netta win irjjan Rrebbi ad irjju ayen terjja tteryel. Assa a nettkel kan ɣef yiman nneɣ u ad tt-nqwemmer kan akka gar aneɣ ma illa nebɣa ad d-nḥelli tilelli i ugdud nneɣ. D aya kan. Atan ar ɣur-ek wawal a Asman a gma. Inṭeq uterras nni iqqimen ar tama-s inna: - Medden ssawalen-iyi Asman. Maca isem-iw Amar Xujja Aḥsen. Lulaɣ di taddart at Meksent deg At Abdelmumen. Fɣeɣ s adrar seg wass-mi d-rriɣ ttar n baba i ɣef ituɛedda yiwen “uqjun” ḥaca timira nwen. Yerna aydi yagi irna yas zzux d wawal imi d axwummas n Lqayed. Akka i issagwad medden. Ma d ass-a aql-i yidwen s tezmert-iw d tdukli-w. Attan nnuba ar Amar. - Isem-iw Amar Amsaḥ n tɣiwant n Haussonvilliers (Nnasirya n wass-a) iyi-tt-wagedlen ass-a. Nɣiɣ dinna yiwen uterras d Aɛrab azzayri illan d ccaf-iw deg yiwen laɛzib. Laɛzib-agi d ayla n yiwen ukulun. Aterras-agi ihi itekkes sser fell-aneɣ s ifellaḥen. Asusef d regmat si sbeḥ ar temeddit. Izga iqqar-aɣ “kelb ben kelb” u yiwen wass issuli-d ajenniw-iw issaweḍ-itt armi ur zmireɣ ara as-awiɣ nnig wanect-en, dɣa tekkaɣ-as din. Ussan-agi ad zemmen 12 n waguren aya-gi. Mawel aql-i zgiɣ di Rebeval (Beɣlya) u ass-a ferḥaɣ aṭas s yis-wen imi sya d asawen ad tuɣalem d imwansen.

Aterras wis kuz imgarad cwiṭ fell-asen. Issusem ikmed maca tamuɣli-is qessiḥet, tessagwad. Ṣṣura-as tettbin-ed amzun iffeɣ-itt rruḥ. Seg-mi id-iwweḍ d netta ɣef tiṭ Umerri. Dɣa inṭeq-d ula d netta: - Nek akken zriɣ, ulac ayen isemgarden amakwar d umerwal ɣef yemsulṭa neɣ d imenfi ɣef tektiwin-is. Ittwagdel-asen akw wass d tikli gar medden. Mgal tigi zriɣ a neddukkel akken ma nella u atent-nqazem s uzday n lqed. Maca ɣur-wat ad tettum iman nwen. Ilaq a nezwir deg iman-nneɣ u mi neccur lejjwayeb nneɣ d tḥawacin n twaculin nneɣ ad d-nelhi sakin d iẓawaliyen d igelilen. Acku amɣid d adebbuz kan i ttqadar wanag awal aẓidan s ucennef akw i t-ittarra.

Mi ikfa uterras-agi tiyita di medden, issekna aqerruy-is issusem. Umerri iẓra yir awal am wagi ur issuffuɣ ara ar wayen ilhan. Iḥus am akken ad asen-yuɣal uterras-agi d azrem uqelmun. Injjer taɣect-is inna yasen: - Nek n taddart at Jimaɛ n Iwaḍiyen. Zriɣ izwwer-awen-d Muḥ Aṛezqi awal fell-i, fiḥel ma nniɣ-awen-d ayen iwen-dinna yagi. Ass-a nemlal-ed dagi akken a nemsefham ɣef tikli nneɣ d wamek ara asen nekker i wid irkḍen deg uɣref nneɣ. D aɣref i ɣef ara nsenned u d netta kan ar aɣ-isselken. Aṭas n wid iɣ-d-izwaren yagi ar umadaɣ maca imi tuɛeddan ɣef ifellaḥen, uɣalen ar medden am jenjjar i tiṭ. D ulaqrar almi ttwakemcen acku amɣid issaɣ akw ɣef tmurt am umccim di tiɣilt. Ilaq ad nsed ɣur-s ad isenned ɣur-neɣ, ad tili tagmatt gar aneɣ. Ma illa nessedda-t gar icenga nneɣ xas d aẓawali iceffu u issen ad yandi. Ma llan medden d tirni ar tama nneɣ, aɣ-d-fken ucci, ad ldin allen u ad fken tamezzuɣt fell-aneɣ. Iswi nneɣ macci d tukarda macci d tamḥeqranit deg ẓawali. Iswi nneɣ, s yiwen wawal, d tiririt n tissas i wid mi-tt-ksen Iṛumyen d ixwumassen nsen. Tikli nneɣ ad tili d tin zeddigen u ad ilin ilugan a tt-id-izzerben. As-d-ilin d tilisa. Tura imi d nek i d aqerruy n tarbaɛt, tura kan awin-ten-in-inniɣ yiwen yiwen u ad awin arnuɣ kra n wayen ttɣunfuɣ d wayen d wid ur iyi-d-nezgi ɣef tiṭ.

Tagara n Umerri

Qqimen di 4 di tɣarɣart, ɣef tyeggirin, zzin-d i tarbut n seksu d waftaten n uksum irsen ɣef ugartil. Iqḍa-d inefq-ed Aâli imi iâareḍ-ed imeddukal-is. Tarbaât Umerri d Muḥ Aṛezqi di sin, netta d âaemmi-s di sin. Tetten, ttnecraḥen, ttaḍsan. Yak d imeddukal. Iɣli-d laman gar-asen. Ur d-illi usurdu, ur d-illi ccek. D tagmatt. D tadukli ɣef tgella d lemleḥ. Maca Aâli izga itett Umerri s nqar n tiṭ. Amzun ittalas-as-tt. Amzun iceggeḍ-it kra. Netta tuɣ-it yunditt netta d âemmi-s. Ksan-d tundar yiwet yiwet, almi d-ssawḍen Umerri ɣer txenfuct ubeckid nsen di tesga n uxxam nsen.

Umerri ur yuki d nda mi itekkat. Ur yuksan, d netta d umeddakul-is tuɣiten di nnican, gar tɣunam n tmegwḥelt n Aâli. Aâli Wasel, n Iâezzunen, d ameddakul-is iḍelli, d amedddakul-is assa. Ur d-yelli wayen ara a t-ikukru. ɣur-s, am akken ur ḍrint. Âait ɛait. Wanag, urjjin isrussuy tamegwḥelt-is ar tmurt. Tezga ar yidis-is, ɣef udem ufus akken mi tt-iḥwajj ad tt-iddem imiren imiren. Azal ttaken Iqbayliyen n imiren i tmegwḥelt am win ittaken i tlawin nsen: ur ittnuz ur irehhen! Assen, isers-itt, isenned-itt ar udekkan di teɣmert. Ur d-lli ara ɣef udem ufus-is. Mi inuda fell-as, yuɣit ismar-as Aâli macci d yiwet n tarsast. Isḍarḍeq-as ibardiyen-is am netta am umeddakul-is. Teffeɣ swa swa akken i tt-undin. Wa iqqar d Aâli i itekkan ɣef znad wa iqqar d âemmi-s. Ama d wa ama d wihin, Umerri yuɣal d aquran di tɣerɣert. Icca-t waldun di tesga n ṭṭlam. Izirig ileddayen yuzel ɣef tamart-is. Immut. Si tiremt-nni d afella, tensa tafat n Umerri. Iquc usirem id-irra i watas n medden. D ayen d tagara.

Xas akken, ikmumes amzun d aqejmur, d ajdar, ɣef udem-is issaɣ-d yiseɣ. Ittban-d amzun immut s tfenṭazit neɣ am akken ur ibni fell-as. Timi-s tekres amzun ur yuḥtam ara ayen iḍran yid-s. D aya ihi i ɣef Aâli d âemmi-s ufan ulamek ara as-anfen akken. Ksen-as ula d talaba ines zeddigen, selsen as tayeḍ yumsen, ixnunsen. Ssufɣen-t seg uxxam u ewwin-t ar iɣzer akken ad ssidren seg azal-is. Ladɣa dina is-gan tafuṭuttt-nni id-iqqimen ar medden d tirni. Seg-s issenned ɣef tezṛutt amzun illa win i t-issarsen. Ur d-iban ara deg-s am win iɣlin, am win icca waldun. Ihi ula di tmettant rran ad t-ssimsen. Dagi akw i t-ttwaɣ. Acku caḍen, ttḥarqen. Am akken tamgarḍt-is ur asen-teccur ara tiṭ.

Imi Umerri yuɣal i Iṛumyen d iqeddacen nsen d jenjar i tiṭ, d aṛejjaq di tgerjumt, llant-ed deqs n temliliyin fell-as. Lkumanda n Tizi Wezzu, ccambitat, lqayed, d iḥerkiyen nniḍen akw i tezzin fell-asen u ternuḍ-as s ufell-a kra n win i wumi ifka tiyita akken ad t-id yerr s abrid. Myal tikkelt, ad as-sennin kra illan gar wallen nsen nutni d ayen n dir, d ayen ifɣen i ibardan. Kra n wanida d-tella tukarda, kra n wanida id-illa imenɣi ad t-aebbin ɣef uqerruy Umerri. Xas akken, Umerri izdeɣ deg ulawen n medden u yiwen ur ifki deg-s afus.

Macci d tikkelt tura i iḥeccem Umerri imsulṭa-agi umaḥras, i ten-id isban d iqwrar imi ur as-zmiren ara. Ur as-ttawḍen ara ula ar ugarz. Mâebbaren d tikti n tuṭfas macci d tikelt u tagara ur d-iffeɣ kra syin imi imezdaɣ n tmurt llan-d ar tama Umerri. Ansi is-kkan Iṛumyen d ixemmasen nsen, netta s ufus n medden, ad yekk ansi nniḍen. Isban-iten-id d wid ur as-nezmir d netta urjjin iḥbes acemmet deg-sen imi izga ucaqur ines n teɣdemt ittqeddir.

Tusa-d tikti i lkumanda amek ara tsekertfen. Ẓran akken ad as-awḍen ilaq asen ubrid n laman:yiwen seg imeddukal-is. Ilaq as-sbedden. Maca anwa seg-sen? Amek ara t-qenâen ad ibxes u ad ifek afus deg Umerri illan imiren d assaḍ gar wallen n medden d tirni?

Refden sarsen ufan-d ilaq ad t-smarkin netta d yiwen seg imeddukal-is. Akken ad yilli usemmarki ilaq ad afen taɣwsa ur izmir umeddakul-is ad isemmaḥ. Ilaq asen ad afen kra uxeclaw ur izmir as yanef Uqbayli ad iâeddi. Ilaq kra d amuqran, ara yawḍen i umdan ar tamart-is, ar isseɣ-is, ar nnnif-is. Ayen ara t-icemten gar medden ma ur d-erri ara ttar. Am tamgarḍt, neɣ tuksa n sser. Xemmem as diɣen aṭas u gezmen di rray d akken zemren ad qqenâen yiwen seg imeddukal-is ma illa sbaben-as agejdur, ma illa gren-d tameṭṭut-is ar taḥsirt xas akken ur tuksan ara. Akka ihi ssalin tasraft, fernen Aâli imi d ameddakul amuqran n Umerri yerna tella-d ɣur-s tmeṭṭut tecbeḥ nezzeh, akken d-nnan. Gren fell-as meskint ayen ur texdim.

Ewwin-t ihi ar Tizi Wezzu ɣef tqacuct iqerray nsen. Azal n 3 ussan d wuḍan i teṭfen ɣur-sen akken ad tessimnen. Dɣa rwin-as aqerruy-is akken iwata. Ssawḍen ihi almi iten yumen d akken Umerri ikcem-as s axxam u kkes sser ɣef tmeṭṭut-is. Netta anect-a yak ur d-illi maca di tegwnitt am tinna, ibundel Aâli . Idderɣel. Yuɣal ittwali kan amek ara ineɣ Umerri acku mawel ad ssufɣen awal ar taddart u as ittwagdel wawal gar yergazen. Akka i tella imiren. Isseɣ d nnif am tamgarḍt. Ma illa iffeɣ-d wawal macci d ayen fessusen ad tesfehmeḍ i medden d tikarkas. Ladɣa ladɣa ma ɣef tmeṭṭut imi kra illan d isseɣ n twacult, itti ɣef uqerruy-s nettat yerna ur tezmir ad tenni kra.

Iffeɣ-d Aâli syin u deg uqerruy-is tban tikli: ad ineɣ Umerri, ad yerr ttar akken i wata. Ifra ssuq, tenza sselâa. Immeslay d âemmi-s imi tamsalt tâna akw tawacult-is. Emtawan amek ara t-ksen si tudart imi yuɣal-asen d ugur, d ayen iten ssarxan gar medden.

Bernen Iṛumyuen d iqeddacen nsen ihi Aâli almi yuɣal irra iman-is d qebbaḍ lerwaḥ am winna n tmucuha. Win n tmucuha meqqar ittass ar win i wumi teccur, ma d Aâli iccur-itt i Umerri. Akka ihi is-ihegga imensi. Yir imensi. Win n uɣurru. Yiwen ur yuksan wayeḍ ur yuklal. Umerri ur ixdem kra, Aâli Wasel seccen-t, ccuren-as taqerruyt d tmelɣiɣt almi ulamek ara yidir ma illa idder Umerri. Ṛzag-it wussan skud idder Umerri. Ufan-as abrid. Deg ussegwass n 1947. Di furar. Ass wis 16. Deg Iâezzunen. Swa-swa ass-mi id-issali Krim Belqasem tarbaât-is OS yulin s adrar send 1954. Yak mlalen netta d Umerri akken ad dduklen mgal amaḥras maca ur umtawan ara, ur zgin ara ɣef yiwet n tmuɣli. Maca ar assa ur neẓri ara amek id-teḍra gar-asen neɣ wisen ayen ur dduklen ara.

Iffeɣ yir awal d usali n wayen iḍran d Umerri u yuɣ akw timnaḍin n tmurt n Iqbayliyen d tin n Llezzayer d Fransa. René Leiber n uɣmis Le Journal d’Alger, yuli-d ar Tizi Wezzu u yura amagrad ɣef Umerri d tagara n “txidas, war-laman d yir sekka” di tmurt n Uzwaw. L’Écho d’Alger diɣen yura ayendin si yennayer ar furar 1947 ɣef Umerri d tarbaât-is.

Tamettant n Umerri wa tesrut, wa isfenxer kan. Wa irgem-it wa iwwi-t-id d asefru. Xarttum ar ṭaqa n Iqbayliyen, Umerri ad iqqim i lebda.

ḤMED UMERRI sɣur Ɛ. Mezdad, 1974

Akken kan yebda tikli
Atas i ţ-yeddan fell-as
Semman-as medden imenfi
Neţţa d tirrugza i d ayla-s
Ma d win yellan d anesli
I Ḥmed yesbur talaba-s.
Anwa-t Ḥmed Umerri
Deg umadaɣ i yeţţili.
Isemmeḥ adriz ɣur-es messus
Inuda ɣef tilelli
S anda inuda afus
Yufa tagmaţ ur telli
Yeqqel wemdan d aṭarus
Di tal tiɣmert d agani.
Anwa-t Ḥmed Umerri
I-mi ur as-yezmir Urumi ?
Teffeɣ-d tejɛalt d tameqqrant
Win i t-yenɣan ad ţ-yawi
Yiwen wass atma-s ṣumren-t
I yas-izemren d nutni
Abeckiḍ bu-sebâa ɛellqen-t
I Ḥmed heggan-d imensi.
Wi nɣan Ḥmed Umerri
D atmaten-is neɣ d Arumi?
Izem yemmut di laman
Din i yeɣli ɣef uḍebsi-s
Aɛdaw yeṭtef wi t-yenɣan
Yezwi-yas akk tilkin-is
Ḥmed yemmut di laman
Am neţţa am yemrawen-is
Yemmut Hmed U-Mem
Ilul-d Ḥmed Umerri.

Yennayer 1974

Ayamun; asmel n tsekla tamaziɣt
Imyura; asmel n imyura n tamaziɣt Archived 2013-08-12 at the Wayback Machine