Aderyis

Yal mi ara d-taweḍ tefsut,leqbayel si zik-nsen ttmagaren-tt s lferḥ .Ass amezwaru n tefsut neɣ ‘’ amenzu n rbiɛ ‘’d ass n tmeɣra di akk tamiwin n tmurt.Tuget skaren deg-s imensi ɣef demma,llan daɣen wid itteffɣen d igrawen ɣer yigran akken ad ẓren agama zegzawen,yettwareqmen s yijeǧǧigen yefsan.

Tama n At Weɣlis,am nettat am waṭas n yimukan di lǧiha n Summam,imezdaɣ–is ttmagaren tafsut s ucɣal n yimensi iwumi qqaren ADERYIS.Aderyis,d isem n yiwet n teḥcict i d-yettemɣayen di lexla.Imenza ḥekkun-d fell-as dakken deg-s dwa d waṭas n lmenfiɛa i tezmert n wemdan.Ɣef waya,tteggen s yes-s imensi ideg ara ččen akk wat uxxam.Ladɣa yal mi ara d-taweḍ tagara n furar,meḥsub di ddurt akk tamezwarut n wagur n meɣres,ad tafeḍ imezdaɣ akken ma llan ttḥerkilen wa deffir n wa akken ad sfuglen ‘’amenzu n rbiɛ ‘’.Wid izemmren,ttruḥun ɣer lexla,akken ad awin iẓuran n teḥcict-a i d-yettemɣayen di lbur aked ikeḍran ;llan daɣ wid i yesmenyafen ad tt-id-aɣen di leswaq i d-iqerben,yecban ssuq n Sidi Ɛic.

Tameddit n wass,tulawin yuɣ–itent lḥal fetlent seksu,heyyant-d leḥwal yecban : lbaṭaṭa,llubya,ibawen aked lḥemmeẓ .Ad sfurent kullec ɣef tikelt deg useksut yersen ɣef teccuyt irekkmen,daxel-is iẓuran n uderyis aked tmellalin.

Lawan n yimensi,ad d-nnejmaɛen akk wat uxxam ɣer terbuyt yeččuren d ameqful ifuren s uderyis.Yal wa ad yaɣ deg-s tiremt-is,ad yernu ad yečč ayen i t-id-isaḥen seg tmellalin.

At zik,smenyafen dakken mi ara yečč yiwen imensi-nni,ur ites ara aman.Aya ttwessin fell-as,iwakken aderyis yellan d dwa,ad d-yeǧǧ seḥḥa deg wid akk i yeččan.S wakka ansay ad iɛeddi di talwit d lisser aked tezmert.Ttiɛad ar umenzu n tefsut ara d-yezzin.

                                                               Mokrane Chikhi