Buɛfif

Ussan send Amenzu n Tefsut

Buɛfif d yiwet seg leɛwayed n tmurt n Leqbayel. Buɛfif yettemcabi ɣer tmeɣra n « Halloween » n Irumiyen. Ussan ineggura n tegrest, ad tennulfu yiwet n terbaɛt n ilemẓiyen tin ara d-itezzin ɣef yakk taddart, tawwurt s tewwurt, ur tettağğa ula d yiwen n wexxam.

Anwa i yettilin deg Buɛfif : -Amɣar (Abuɛfif, Ameryus) win yettlusun aqric, -Tabuɛfift (Tameryust) ad iḥezzmen akk iman-is, -Aberraḥ -Wid yekkaten tajewwaqt d ubendayer -Ilemẓiyen nniḍen

Tarbeɛt-a mi ara d-taweḍ ɣer wemnar n wexxam, aberraḥ ad isuɣ : Aberraḥ : Kker ad yeskker Rebbi seɛd-ik ! Ilmeẓyen : Wamin ! Aberraḥ : Ad aken-igg Rebbi am tɛeqqayt n ččina, suffela tecbeḥ zdaxel terbeḥ ! Ilmeẓyen : Wamin ! Aberraḥ : Ad aken-igg Rebbi am tqermudin, wa ad-yeddal wa ! Aberraḥ : A d-irr Rebbi lɣiyyab bxir weɛlaxir ! Aberraḥ : Ad aken-yekkes Rebbi seg lḥif ! Ilmeẓyen : Wamin ! Aberraḥ : Ldi tawwurt ad yeskker Rebbi seɛd-ik Ilmeẓyen : Wamin Aberraḥ : A k-iḥrez Rebbi arraw-ik ! Ilmeẓyen : Wamin Aberraḥ : Ad iceɛceɛ Rebbi tafat-ik Ilmeẓyen : Wamin !!!!

Ilmeẓyen (S ccna) : Wa Ḥmami Wa Lmami Ma d tamellalt ad tt-nawi Attan deffir ukufi

Ad s-sserḥen s tjewaqqt d ubendayer, Ameryus d Tmeryust ad ceṭṭḥen, wiyeḍnin ad kkaten afus. Bab n wexxam a d-yeffeɣ, a d-yawi yid-s kra (Timellalin, ččina, idrimen, lbaṭaṭa, acedluḥ…). Umbeɛd Ameryus ad yeɣli ɣer lqaɛa, zeɛma yesker. Ur d-yettaki ara alamma fkan-as ayen i d-yefka bab n wexxam ad t-yesriḥ. Sinakkin ad beddlen axxam nniḍen..