Mmeslay:Tafsut Taberkant
Tafsut Taberkant Tafsut taberkant d isem i nettak i tiɣewwaɣint tukriḍin i ṭṭerḍeqen di Tmurt Leqbayel akkw d imḥaqen id yefka igen azzayri gar yebrir 2001 d yebrir 2002. Amḍan n wid yemutten gar imesbaniyen yettali ar 126[1] dɣa amḍan n wid yettwajerḥen yettali ar ugar n 5000.
Ass n 20 deg ibrir, d amulli n tefsut imaziɣen, amulli n tefsut n tlelli. D yiwen wass i deg a nesfugel i tikkelt tis 25 tadyant n imaziɣen. Anwa-t weqbayli ur nesli neɣ ur nessin tafsut n imaziɣen? Anwa-t umaziɣ im’ ur yiwiḍ yissel? Wa yecfa wa ala akken it-iccenu Abranis deg yiwet si tezlatin-is maca, tura, seg weqrur-nni amecṭuḥ alma d amɣar-nni acaraf, ssnen awk anamek-is uzemz-a*. Azekka daɣen, a nemyager akk d yiman-neɣ, akk d weḥric-a axatar deg umezruy azi* n Tferka n ugafa.
Mačči d asfugel iɣ-d-yeggran ass-a, ur ɣ-yeţţak wul i waya acku gran-aɣ-n yiswan wuɣur mazal werɛad nessaweḍ, yeggra-ɣ-n webrid i mazal ur ifuk ara, ggrant-aɣ-n ccfayat ur neḥriz akken iwata... teggra-yaɣ-n tutlayt nneɣ i yuɣalen amzun d taǧǧalt. Ggrant-aɣ-n terwiḥin n wid yeţwanɣan di tefsut taberkant. Widak-nni i d-yekkren di 80 d widak i d-yekkren di 2001 yiwen n yiri nsen. Timesbaniyin-nni i yeḍran di tmurt n leqbayel send iḍelli, iḍelli neɣ ass-a, ţţakent-ed udem n weqbayli i yerɣan af tlelli. Ayen awk wiɣer id-nessaweḍ ass-a, 123 n imeɣrasen i nɣan iserdasen d isultiyen n udabu azzayri aɛrab inselmizri akk d ibuxusen-is, yesban-aɣ-d dakken: ger yiḍelli d wass-a, ulac dacu i ibeddlen fell-aɣ. Imi mazal neqqen arrac nneɣ am yizan, teţwaḥreṣ ugar n yiḍelli. « Aman-nni yeččuren d ḥellejɣar d nutni d nutni, bedlen-asen kan acemmux » Tafsut imaziɣen mačči kan akka i ţ-lul-ed ger yiḍ d wass: dayen wiɣer i d-nessaweḍ, dayen awk id-yekkan zdat-es i ţ-id-ismentsen.
Idim mazal tuɣ yeḥma ass mi yeţwakkes usarag n Dda lmulud af tmedyazt taqburt n yeqbayliyen(asarag-a tuɣ teţţuhega-n i wass n 10 di Meɣres), yugi-ţ udabu azzayri, teţwakkes kan akka...d amnukal n ugerzu n Tiz-Wezzu s yiman-is i s-ţ-yennan i dda Lmulud. Si tal tama, di yal adrum, bdan medden ţţarran nnehtat si cayaḍ i sen-iserkeb udabu azzayri, bdan ţţiwzagen waman...aseqqi yemmar-ed akken yerɣa. Meḥyaf-nni i isik Bu-iledyen af yeqbayliyen yezzi-d af bab-is, tefɣ-ed tiɣri n wid yugin ddel d uzaglu. Dɣa tetṭerḍeq af tikkelt, temmar-ed af yiwin yidis. K. Belqasem d yiwen seg yiḍan n “El-Moudjahed“ i s-d-itekkan i dda lmulud, s rregmat akk d useglef; ira ad yefk iɣil i wat-is: wid-nni iɣ-d-imedlen tiwwura, wid-nni iţţarrayin af wegdud. Tamesbanit tamenzut i d-yellan di Tizi-Wezzu d tin n 11 Meɣres 1980, tsembiwel addad (liḥala) n timiren. D inelmaden d tinelmadin n wasif Σisi d Ḥesnawa i yetṭfen tuɣḍaṭ-a, ur ẓẓrin ara kan dacu i yellan yegguni-ten …
Aɣaram asdawan n wasif ɛisi, mazal-it ar ass-a i wakken a d-yesmekti wid yeţţun, akken a ten-d-yeḥku af yiḍ-nni n 19 Yebrir mi d-mkuben iserdasen s yeqjan. D ahmaj i hemjen deg inelmaden d tnelmadin. Acḥal iwin ar lḥebs, acḥal ɛedmen ger-asen... A nekk seg wayaki mebla ma neţţu awk imeɣnasen i s-yefkan udem azedgan i wayen i d-yeḍran. Ur ntekk ara kan akka ma yella ur d-nudir irgazen am Σebbuṭ, Lunawsi, Mezdad, Saɛdi, Mhenni, Zituni... d yawk arrac nneɣ i iseblen iman-nsen i wakken tadyant n 20 Yebrir a ţ-aweḍ ar tal taddart di tmurt n Yeqbayliyen. Aseggas yezzi af waya, si tama n Bgayet iɣ-d-tekka taɣrit n Imaziɣen tikkelt-a... Tafsut n 1981 Ilmeẓyen d telmeẓyin n din ččan aḥlalas n udabu azzayri, awal nsen yiwen: werǧin ad teḥlelli-d tugduţ i yeqbayliyen.
Seg wass-nni, Iqbayliyen fkan awal, ggulen dakken tineţţi nsen ur tnegger u s deffir-sen ḍefren-d imaziɣen s umata. Ulayɣer a nesṭuqet awal, d timuggiyin i asenfar nneɣ. Imal n yeqbayliyen atan di tmurt nsen, iẓuran-nsen ɣzan almi anda yiwen ur yessin…Imal n tutlayt nsen atan ger tarwa-s, atan di tmurt-is, deg urebbi n warraw-is. Talalit n Umussu Adelsan Amaziɣ s tumert medden ay ţ-muggren, ass-nni i yebda umennuɣ af yidles d tutlayt nneɣ yeţţali yeţnerni almi ass-a, ulac win ur nessin xas ula cwiyya n umezruy nneɣ. Tafat iɣ-d-isiɣ Umussu d ajgagal s wiyes nerfreẓ abrid deg wi’ nteddu, nerfed aqerru nneɣ ar igenwan mebla akukru. Ula ma xas ass-a, Amussu yebḍa d icḥricen seg mi kkan ikabaren nnig-es, iswi-s amenzu n win n widak icḥemlen ayla nsen, akal nsen...
Azekka d amulli n wass mi d-tefrari tagut af wid iran seg wul tugduţ d yetṭfen deg iẓuran nsen…amennuɣ simmal irennu, agdud simmal yeţţaki. Ad rnuɣ af wayaki, amennuɣ n imeɣnasen s yimru , tamedyazt d ccna.
Tisimirt[beddel] Yebrir 2001[beddel] Ass n 18 yebrir 2001, Masinisa Germah, asnawan ilemẓi, ttweneɣ s uzayaḍ n tamegwḥelt taymanit sɣur imestulen deg taqcelt n tamsetla n At Dwala. Tadyant agi — i kecmen deg umazrar n timeskanin tiεdawin mgal timeḍrit sɣur tidusiyin n tasunḍa — attili d aferdis n ussenker n tanekra taqbaylit. Timeskanin ṣeggement deg akkw Tamurt Leqbayel maca imusnawen tetsawelen ar urusan iwakken ur d yettili ara ucaf n idammen.
Ass n 21 yebrir 2001 deg umenni n 11 n ṣṣbeḥ, tamsetla n Amizur tsseḥbes 3 ibalmuden yetṛuḥun ar usarir n tɣiwant s iselmaden nsen n uddal akkw d imddukal nsen. Isali yexdem tuzzya n twilayt dɣa iselmaden kkeren iwakken tikli am ttagi ur ilaq ara ad ttili tikelt nniḍen.
Ass n 22 yebrir 2001, yella-d amsegraw di Amizur sakkin usiwel n unmalu n iselmaden n twilayt nni. Llan kra n imyuḍḍafen war teqseḥ. Iḍ n wass nni, aneɣlaf n ugensi, yedmen isalan n ulɣu yettwerren d azayez sɣur anzaḍ n tamsetla taɣelnawt ɣef lmut n Masinisa Germah, yesseɣret (ɣef Masinisa) « d arneggay n 26 iseggwasen ». Sakkin taseɣrut agi, taɣemsa tessuffeɣed aɣmis n tlalit n Masinisa i tesbegnen deg tilawt d asnawan n 18 iseggwasen.
Ass n 23 yebrir 2001, igensasen n iselmaden n akkw iɣsuren n Umizur i jemɛen ass n letniyen 22 deg CEM, 600/200 sawelen-d deg isem n CETA ar yiwen umsegraw acacfal di Amizur ass n 23 yebrir 2001. Deg taswiɛt yedukklen, igiman n iɣermanen ṛuḥen-d ɣer tamnaṭ agi ur teɛeḍḍil ara att kker times.
Lwennas Meɛṭub seg imezwura i sen-yerran tajmilt i tlawin d yergazen n tefsut imaziɣen, tasfift i d-yessufeɣ kra n wayyuren kann s deffir 20 yebrir anda icennu:
eḥzen lwed ɛisi Mi yebda imenɣi Yewweḍ-iten lɛesker deg yiḍ Tuddar slant irkwelli, suwwent ɣer Tizi Kul abrid a yeţfeggiḍ. Ur telli d tisselbi, nehwaǧ tilelli, Uqbel aɣ-ḥerren ɣer lhid. Akken nella zik a nili, Ma yella imenɣi, W’ immuten ad yennerni mmi-s. A wid iḥekmen ayenni, ur nelli d ulli, Tamurt iban-d lsas-is. Tamaziɣt ad tennerni ...
Ferḥat Mhenni yeccna tafsut n imaziɣen:
Nnif d lḥerma d ayen yeḍran Di tefsut n Tizi-Wezzu Llan d ilemẓyen d tlemẓyin ffɣen-d s iberdan. Nnan-d ala dayen neɛya Si lbaṭel akk d uzaglu ...
Neɣ ayen yeccna Buǧemɛa Agraw :
Timest n 54 tensa di 62 Teggra-d tirgit deg iɣed-nni Tuɣal tecɛel di 80 Teṭṭef-itt-id tidet n lesnin Ansi i d-isuḍ ubeḥri D leqbayel i izuggiren Mazal-aɣ d imaziɣen ... Ma ttuɣ arrac nneɣ yeɣlin, Nek mačči d aqbayli
Lwennas d dda Lmulud Mazal-aɣ d imaziɣen Ur nettruz' ur nkennu Ur nqebbel ara azaglu Mazal-aɣ ... mazal-aɣ d imaziɣen
Démarrer une discussion sur Tafsut Taberkant
Les pages de discussion sont l’endroit où diverses personnes peuvent discuter de la manière d’améliorer le contenu de Wikipedia. Vous pouvez utiliser cette page pour démarrer une discussion avec les autres utilisateurs sur la façon d’améliorer la page « Tafsut Taberkant ».
