Racid Ḥituc

Anwa i d-mass Racid Ḥiṭuc ?

D mmi-s n taddart n Yiɛemrac, Racid Ḥiṭuc, ilul deg ass n 09 deg ayyur n mayu n useggas 1962, deg ugezdu n Bgayet, deg tmurt n Yiqbayliyen. Seg temẓi-s i ḥemmel ayen icudden ɣer yidles d tɣerma n tmazɣa sumata,taqbaylit ladɣa.

Zik yella icennu sya ɣer da, yessaweḍ yesekles tasfift, d acu kan ur yessaweḍ ara a tid yessyfeɣ, imi deg akud-nni xussen walallen. Yekkr-d d ameɣnas akken d aleqqaq deg umussu adelsan amaziɣ, yekki deg tikliwin i d-yettilin di Bgayet d Tizi Wezzu d wanda-niḍen.

Ixuleḍ aṭas n wudmawen yettnaɣen ɣef tutlayt d yidles, tettunefk-as tegnit ad yemlil daɣen xilla n yinaẓuren d yimeɣnasen, gar-asen Ferḥat Mhenni d mmi-s Ameẓyan, Meɛtub Lwennas, Taher Ğaɛut, d waṭas-niḍen yal yiwen s yisem-is d leqder-is.

Rnu ɣer yessefra, yerra tijmilin, yella d aɛeggal deg aṭas n tdukliwin tidelsanin, iga xilla n yisaragen d temliliyin ɣef yidles d tnekkit. D ameɣnas n yizerfan n umdan d tlelli n umeslay, ibedd ɣer wid yenḥafen, yura imagraden s tefransist d teqbaylit deg uɣmis Tiɣremt-La Cité akked uɣmis alikṭruni Siwel.

Idlisen i d-yessaẓreg :

• L’autre moi ou la résurrection, 2006 di fransa – 2012 di tmurt (ungal)
• Confession criminelle, 2007 di fransa – 2013 di tmurt (ungal)
• Isegni, 2017 (ammud n tlufa)