Tamesgida n Laqṣa
| Country | Falesṭin, Israyel  |
|---|---|
| Located in the administrative territorial entity | Old City of Jerusalem |
| Coordinate location | 31°46′35″N 35°14′8″E |
| Religion | Islam |
| Architectural style | Islamic architecture |
| Heritage designation | UNESCO World Heritage Site |
Tamesgida n Laqṣa (anamek s tmaziɣt: Tamesgida Ibeɛden/Tubɛidt), d amkan imqeddes n wesɣan n Lislam, yezga-d deg temdint n Lquds, deg Falesṭin (yellan ass-a ddaw tuṭṭfa tisrayilit).
Tamesgida-a d nettat ay d amkan imqeddes wis kraḍ deg Lislam, deffir Lkeɛba (deg Mekka) akk d Tmesgida n Umazun (deg Temdint). Deg wakal n Laqṣa tella tmesgida akk d Tqubbet n Weẓru. Seg wasmi ay yettwaṭṭef weḥric agmuḍan n temdint n Lquds, deg 1967, Israyiliyen bdan sseddayen ddiɛaya ay d-yennan tamesgida-a tettwabna deg wemkan aydeg yella, zik, ufakan (temple) n Sidna Sliman, yerna, deg yiseggasen n 1990 d 2000, bdan qeddcen akken ad kksen amkan-a i Yinselmen imi ay t-ttwalin d amkan imqeddes akk deg wesɣan (ddin) n Wudayen.
Maca deg Lislam, amkan-a d imqeddes imi Amazun (Nnbi) Muḥemmed yusa-d yerna yeẓẓul deg-s deg Yiḍ n Lisṛa. Nnig waya, d Tamesgida n Laqṣa tella d lqebla tamezwarut wuɣur llan ttẓallan Yinselmen, arma ay d asmi ay ten-yumeṛ Ṛebbi ad rren Lkeɛba d lqebla. Sakkin, asmi ay kecmen Yinselmen ɣer temdint n Laqṣa, Ɛumar ibn Xeṭṭab, axlif n Yinselmen, yebna tamesgida deg wemkan-nni.
Umawiyen smeɣren tamesgida-nni, yerna fukken-tt deg useggas n 705. Deg 746, twet-d yiwet n tzenzelt ay tt-ihudden, dɣa ɛawden bnan-tt Yiɛebbasiyen deg 754. Deg 1033, thudd-itt tzenzelt niḍen, dɣa ɛawden bnan-tt Yifaṭimen deg wemkan aydeg mazal-itt ar ass-a. Deg 1099, Inmudag (croisés) imasiḥiyen ẓedmen-d ɣef temdint n Lquds, snegren imezdaɣen-nnes yerna rran tamesgida-nni d taklizt. Maca, asmi ay ten-yessuffeɣ Ṣlaḥeddin, Inselmen ɛawden rran tamesgida-nni d amjan n tẓallit.
Deffir ccwal ay inekren deg 2001 deg Falesṭin, Israyiliyen gedlen i wakk Inselmen n umaḍal akken ad ẓẓallen deg tmesgida-a, menɣir Aɛraben n Israyil. Nnig waya, Israyiliyen ttkemmilen leqdicat-nsen n ussekfel ddaw tmesgida-a, ula ma Inselmen ugin aya imi ay yezmer ad ihudd llsisan n tmesgida-nni. Ma d imedḍurfa israyiliyen, ttgallan ad hudden tamesgida-a akken ad bnun deg-s "Afakan".