Tamaɣuzt
Tamaɣuzt deg tesnallunt d afimidi n iferdisen i d-yettgin kra n tfekka tagennawt iẓẓayen ɣef uhidṛujin d uhilium. Imusnawen ssemrasen tanfalit n tmaɣuzt i weglam n tilin n iferdisen niden s umata acku amur ameqqran seg yitran i d-issiliɣen tanga yettwaẓren deg usedday tegber seg uhidṛujin d uhilium. S wanecta, asignew igebren seg weksujin d Niyun d ukaṛbun d unitrujin yezmer ad yettwaglem d akken-it yeččur d tamaɣuzt seg tama takrurant ɣas akken iferdisen-nni ur ttwameggzen ara d imɣuzen, akken daɣen ur yessefk ara ad yili urway gar n tmaɣuzt d imɣuzen d waqqan amaɣaz acku ulac aqqan akruran neɣ amaɣaz deg yitran (anagar deg yitran isemmaṭen yeṭṭafaren asesmel K yakked M) yerna aqqan akruran inessen deg tegnit ur d-izzag ara deg tegnatin n wul n yitran.
S tmusni n tmaɣuzt n kra n tfekkiwin tezmer ad tili tukza n waddar-is. Acku ass mi i d-innulfa usedday (s unect n teẓri n Big Bang) yella deg tazwara igber seg uhidṛujin, yerna s tarrayt n tseddast deg uṭerṭeq ameqran yennulfa-d deg-s azal meqqren n uhilium d kra n ulitium d ubriliu maca send n uṭerṭeq ameqran Big Bang ur d-lfin ara iferdisen iẓẓayen ugar-nsen. s wanecta, tamaɣuzt n yitran imezrayen tettili s ddaw n yitran itraren (i d-ilfan d imaynuten) am tfukt
