Wikipedia

Amseqdac:WRYSM/Timerwit

Tagelda n Inumiden
Regnum Numidae
Ansa

Numidya di 220 STƐ
Tamanaɣt Kirten (Qsenṭina, Lezzayer).
Imezdaɣ
Gentilé (fr) Suqel Inumiden
Langue prédominante (fr) Suqel Tamaziɣt, Tafiniqt
Ddin Asɣan Amaziɣ, asɣan Afiniq.
Groupe ethnique (fr) Suqel Imaziɣen

Numidya neɣ Tagelda n Inumiden (s Tifinaɣ : ⵜⴰⴳⴻⵍⴷⴰ ⵏ ⵉⵏⵓⵎⵉⴷⴻⵏ, neɣ ⵜⴰⴳⴻⵍⴷⴰ ⵜⴰⵏⵓⵎⵉⴷⵜ; s Tlatint : Regnum Numidae) d yiwet n tgelda Tamaziɣt i yellan di taglest[1] deg ugafa n tmurt n Lezzayer tamirant akked cwiṭ n Tunes d Lmeṛṛuk. Tagelda ayyi yesnulfa-d-tt agellid Gayay U Zelalsen, tella si tlemmast n uwines[2] wis-sin send talalit n Ɛisa[3] almi yemmut ugellid angaru ines, Arabyun, di 40 STƐ[4]. Tamanaɣt-is d Kirten, Qsenṭina n tura di Lezzayer. Iqerṭajen d inaragen-nsen[5] deg ugmuḍ, Imuriyen deg umalu, gar-asen asif Melwiyet. Inumiden bbḍen waggi-nsen[6] di tgeldit n Mass-nsen, mi yeddukel akked Irumanen mgal Iqerṭajen.

Imnayen Inumiden llan ttwasnen deg yilel Agrakal s tifsas[7] d wazzal-nsen[8]. Mi Mass-nsen yuɣal d agellid, yurar netta d yimnayen ines dduṛ axatar[9] deg umgaru abuniq wis-sin[10] mi yeddukel d Qerṭaj di tazwara, d Ṛṛuman di tagara mi Iqerṭajen semḥen deg-s.

Amezruy

ẓreg

Send Taddukli

ẓreg
 
Taqubbett n Yimedɣasen, Tabatent.

Di tazwara, deg uwines wis-sin send tallalit n Ɛisa, Numidya tella tettwabḍa ɣef snat tigeldiwin ur ttemsefhament ara gar-asent : Tagelda n Imasisiliyen deg umalu, agellid-is d Sifaks, tamanaɣt-is d Siga (tura Welhaṣa Ɣeraba, di Ɛin Timucent); Tagelda n Imasiliyen deg ugmuḍ, agellid-is d Gayay mmi-s n Zelalsen, tamanaɣt-is d Kirten (Qsenṭina).
Tagelda n imezwura-nni tella meqqret ɣef tayeḍ s waṭas. Ɣef leḥsab n Strabun, akal-is ibeddu seg wasif Melwiyet almi d yiɣef Bugarun (Qenwaɛ), deg umalu n twilayt n Skikda. Imaragen-nsen n wegmuḍ, Imasiliyen, akal-nsen ibeddu seg talast tagmuḍant[11] n Imasisiliyen almi d tlemmast n tmurt n Tunes tamirant. Ccerken tilisa akkud Iqerṭajen, i wumi llan ttaken imnayen deg yemgura-nsen mgal imenzaɣen-nsen[12], Iṛumanen.

Ɣas tamurt n Imasiliyen tella mecṭuḥet ɣef tin n Imasisiliyen, tella ttwasseɣrem xir. Maca Imasisiliyen llan waɛren fell-asen, axaṭer llan aṭas, daɣen yesgulaf-nsen xir, axaṭer tagelda-nsen tella tanesbaɣurt[13] ɣef tin n Imasiliyen.

Amgaru Abuniq Wis-sin

ẓreg

Mi yebda umgaru Abuniq wis-sin gar Qerṭaj d Ṛum di 218 STƐ, Gayay yeddukel d Qerṭaj, Sifaks yeddukel d Ṛum. Isin igelliden llan ssexdamen yemsisen-nsen i wakken ad ɣelben wayeḍ i weɣmar n Numidya. Deg yigen n Qerṭaj, llan aṭas n yigduden, gar-asen imnayen Inumiden n Imasiliyen, iceggeɛ-iten Gayay. Ddan d Ḥannibaɛl ar Tuṛuft mi iɛedda si tzunegzirt Tibirit (Spenyul) d yidurar n Alp. Mi yebbeḍ ar Ṭṭelyan, ttwassexdmen i unadi n weɛdaw, i wekmin[14] d yimenɣi, uraren dduṛ axatar am di yimenɣi n Tisinius, Tribiya, Agelmim n Transiman, daɣen Kanay (Cannae), yiwen seg yimenɣiyen i yettwassnen akk deg umezruy aɛlaǧal tiḥerci n Ḥannibaɛl deg yiger n yimenɣi. Gayay iceggeɛ daɣen mmi-s Mass-nsen ar tzunegzirt Tibirit i wakken ad yennaɣ d Yiqerṭajen mgal Irumanen.

Mi Mass-nsen yella deg wenẓul n Spenyul, yeṭṭef anẓad[15] n imnayen, yella yettɛawan Iqerṭajen deg yimenɣiyen-nsen. Daɣen, baba-s n Ṣafanbaɛl (Sufunisba), Ɛazrubaɛl, igul ad yefk yelli-s i Mass-nsen, akken ad sededen tamsisit[16] gar-asen. Maca di 206 STƐ, di tefriqt, baba-s n Mass-nsen, Gayay yemmut. Yerna ɣur Inumiden di lawan-nni, axlaf ur yelli ara amukksan[17], ihi macči d Mass-nsen ara yuɣalen d agellid, agellid amaynu d dada-s Ulzasen. Yerna Iqerṭajiyen ɛawnen Ulzasen, axaṭer ttemyilin : yuɣ yelli-s n weltma-s n Ḥannibaɛl. Yemmut Ulzasen deg useggas-nni, ihi sin n warraw-is, Kabusa d LakumazIs, bdan ttnaɣen gar-asen i wakken ad ḥekkmen. Mi llan ttnaɣen sin-nni, Sifaks ṭseḥ-as talemmiẓt akken ad yebdu taḥemla taserdasit mgal Imasiliyen. Sifaks yeddem aṭas n timdinin nsen, gar-asent tamanaɣt-nsen, Kirten. Mi akka, Mass-nsen yuɣal ar tmurt-is.

 
Asebdad n Sifaks, Rum.

Iqerṭajen beddlen ṛṛay-nsen f Sifaks, amenzaɣ n Mass-nsen. Llan bɣan ad yuɣal d amsisa-nsen deg umgaru nsen. Ihi amenẓad Aqerṭaj[18], Ɛazrubaɛl, iruḥ ar ɣur-s di Siga, tamanaɣt-is, akken ad yemsefham yid-s : Sifaks ad yuɣal d amsisa n Qerṭaj. Ṣafanbaɛl, ɣef wumi yeggul ad tuɣal n Mass-nsen uqbel, ad tuɣal tislit-is. Mass-nsen yexser tagelda n baba-s. Qerṭaj ur tɛawen ara Imasiliyen mgal Sifaks, ǧǧan-ten ad xesren waḥed-sen. Ɛazrubaɛl yeddukel d Sifaks, yerna yefka-y-as yelli-s Ṣafanbaɛl, taxḍibt n Mass-nsen.

Di 204 STƐ, yiwen umenẓad Aṛuman[19] ism-is Skibyu iruḥ ar Tafriqt Ugafa mi ifuk taḥemla ines di tzunegzirt Tibirit. Mi Mass-nsen yessla s kullec, iruḥ ar uqiḍun aserdasi n Skipyu, amenẓad Aṛuman. Yemsefham yid-s, yuɣal d amsisa-ines, axaṭer Iqerṭajen semmḥen deg-s. Asbeddel n temsisa ayyi yesɛa asemdu[20] ameqqran, amgaru a ad yeddem abrid nniḍen. Kraḍ n imenɣiyen ḍran deg iseggasen ineggura n umragu di tefriqt : Utika, Izuɣar Imeqqranen d Zama.

 
Adrim n Mass-nsen.

Deg yimenɣi n Utika, yiwet temdint deg ugafa n Tunes ur tbaεed ara f Qerṭaj, Irumanen n Skipyu d Yinumiden n Mass-sen ẓedmen f iqiḍunen n Ɛazrubaɛl d Sifaks, sserɣan-ten. Aṭas seg-sen mmuten, si tmes neɣ nɣan-ten. Kra kan selken, garasen imenzaḍen-nsen. Ɣas xesren aṭas n imgarayen, ssekren igen amaynu, deg-s Iqerṭajen, Inumiden d yimkariyen Ikeltibiriyen, yes ad naɣen Irumanen d Imasiliyen. Isin ignan mlalen deg yimenɣi n Izuɣar Imeqqranen, i yeḍran di Bulla regia, tura Jenduba di Tunes. Imnayen Irumanen ẓedmen f Iqerṭajen, ihi rewlen. Deg igen n Qerṭaj, ḥaca Ikeltibiryen d Inumiden n Sifaks qqimen ttnaɣen, ṭṭfen iman-nsen. Ɣas akken, xesren.

Sifaks, mi yexser, yerwel ar Kirten. Mass-nsen iruḥ yeḍfer-it d yimnayen-is almi yebbeḍ s anga yeffer di tmanaɣt. Sifaks ihegga iman-is d yigen ines, yennuɣ mgal Mass-nsen d imsisen ines Iṛumanen. Mi llan ttnaɣen, imgarayen n Sifaks llan regglen, ɣas akken, Sifaks yella yesɛa tabɣest akken ad yessuddes igen-is, ihi yezwar-iten, maca yettwaṭṭef, yuɣal d ameḥbus n iɛdawen-is. Akka Mass-nsen yerra ttar, yeddem tagelda n baba-s yerna tin n Sifaks, yesdukkel Numidia, teqqim Kirten d tamanaɣt-is. Ṣafanbaɛl tuɣal d tameṭṭut-is.

Maca amgaru ayyi mazal ur ifuk. Deg useggas ay d-iteddun, Ḥannibaɛl ssawlen-as akken ad yuɣal ar Tafriqt Ugafa, ihi yuɣ-asen awal. Igen n Ḥannibaɛl, win yennuɣ yes di Ṭṭelyan, yella meqqer ɣef win n iɛdawen-is, rnu-yas tiḥerci ines, ihi netta i d asirem aneggaru i yeqqimen i Qerṭaj deg umgaru ayyi. Mi Ḥannibaɛl yebbeḍ, ihegga iman-is akken ad iqabel Iṛumanen d Inumiden tikkelt tangarut. Deg yiger n yimenɣi, yella yebɣa ad issexdem tillit i yessexdem di Kanay. Di tgara, d Skipyu i yesxeddmen tillit nni s tallalt[21] n imnayen n Mass-nsen, dɣa yerbeḥ, Ḥannibaɛl yexser.

Tarennawt tangarut inna tesɛa asemdu[20] ameqqran ɣef yimal n Tefrqit Ugafa, axaṭer syinna tettwasdukkel Numidya, tuɣal d yiwet n tgelda yeṭṭef-itt agellid Mass-nsen.

Deffir Asdukkel n Tgelda

ẓreg

Deffir asdukkel n tgelda, Inumiden uɣalen d iskurrzanen[22], aṭas seg-sen uɣalen d urkiden[23], axaṭer nitni tigti[24] nsen llan d imgajjen[25]. Daɣen aṭas imedruzen[26] ttwasekren, am taqerrabt n Tugga, afakan n Cemtu, taqerrabt n Mass-nsen di Kirten.

Tagelda n Inumiden di tgeldit n Mass-nsen tella tankelwit[27] mliḥ. Tuɣal tesɛa aṭas n yimendiyen[28] s uskurrez nsen. Mi yilaẓ yeṭṭef snat n tigizirin Tigrigiyin, Mass-nsen isellek-itent, iceggeɛ-asent aṭas n yimendiyen n wakal-is s iɣerruba-s[29]. Tigzirin nni, Rudes d Dilus, sekren isebdaden[30] i wugellid Anumid. Yuɣal yettwassen di yuk ilel Agrakal.

Amgaru Abuniq Wis-kraḍ
ẓreg
Amgaru n Yugerten
ẓreg

Aseḍɛaf d Uɣelluy

ẓreg
Amgaru Aɣarim Aruman Wis-sin
ẓreg
Aɣelluy
ẓreg

Igelliden

ẓreg

Send taddukli

ẓreg

Imasisiliyen

ẓreg

Imasiliyen

ẓreg

Numidya Tadduklant

ẓreg

Mass-nsen, send ad yemmet, yella yesɛa aṭas n warrac. Kraḍ kan seg-sen yefka-y-asen lḥeqq ad ḥekkmen : Mkiwsen ad yuɣal d agellid, gma-s, Gulusen, ad yuɣal d amenẓad n yignan, gma-s nniḍen, Mastenaba, ad yuɣal d amasay n teɣdemt.

Mkiwsen, send ad yemmet, yebḍa tagelda-ines f kraḍ i sin n warraw-is d yiwen mmi-s n Mastanaba :

Ẓer daɣen

ẓreg

Asegzi n Wawalen d Timselɣa

ẓreg
  1. ↑ Taglest : Antiquité (fr), العصور القديمة (ar).
    Tallit (époque) i yebdan di 3200 uqbel talalit n Ɛisa, tfuk mi teɣli temdint n Rum ɣef ufus n teqbilin tibarbarin di 476.
  2. ↑ Awines :Siècle (fr), قرن (ar).
    100 n yiseggasen.
  3. ↑ Send talalit n Ɛisa : Avant Jésus-Christ (fr), قبل الميلاد (ar).
    Agdazal n send d "uqbel".
  4. ↑ STƐ : Av. J-C (fr), ق.م. (ar).
    Azegzel (abréviation) n "Send talalit n Ɛisa".
  5. ↑ Inaragen : voisins (fr), جيران (ar).
  6. ↑ Waggi : Apogée (fr), أوج (ar).
    Taseggiwit tafellayt (extension maximale.
  7. ↑ Tifsas : Agilité (fr), رشاقة (ar).
  8. ↑ Azzal : Vitesse, rapidité (fr), السرعة (ar).
    Yekka-d seg wawal azzel.
  9. ↑ Dduṛ axatar : Rôle important (fr), دور مهم (ar).
  10. ↑ Amgaru : guerre (fr), حرب (ar).
  11. ↑ Talast tagmuḍant : Frontières occidentales (fr), الحدود الغربية (ar).
  12. ↑ Imenzaɣen : Rivals, ennemis (fr), اعداء (ar).
  13. ↑ Anesbaɣur : Riche (fr), غني (ar).
  14. ↑ Akmin : Embuscade (fr), كمين (ar).
  15. ↑ Anẓad : Commandement (fr), قيادة (ar).
  16. ↑ Ad sededen tamsisit : Consolider l'alliance (fr), توطيد التحالف (ar).
  17. ↑ Amukksan : Héréditaire (fr), وراثي (ar).
  18. ↑ Amenẓad Aqerṭaj : Général Carthaginois (fr), جنرال قرطاجي (ar).
  19. ↑ Amenẓad Aruman : Général romain (fr), جنرال روماني (ar).
  20. ↑ 20,0 et 20,1 Asemdu : Effet, impact (fr), تأثير (ar).
  21. ↑ Tallalt : Aide (fr), مساعدة (ar)
  22. ↑ Askurrzan : Cultivateur (fr), مزارع (ar).
  23. ↑ Urkid : Sédentaire (fr), مستقر (ar). Yezdeɣ deg yiwen umkan, ur yettbeddil ara aṭas amkan n tnezduɣt .
  24. ↑ Tigti : Majorité (fr), الأغلبية (ar).
  25. ↑ Amgajj :Nomade (fr), رحال (ar).
  26. ↑ Amedruz : Monument (fr), نصب تذكاري (ar).
  27. ↑ Ankelwi : Prospère (fr), مزدهر (ar).
  28. ↑ Imendi : Céréales (fr), الحبوب (ar).
  29. ↑ Aɣerrabu : Bateau, navire (fr), سفينة (ar).
  30. ↑ Asebdad : Statue (fr), تمثال (ar).
Yettwakkes-d seg "https://kab.wikipedia.org/w/index.php?title=Amseqdac:WRYSM/Timerwit&oldid=110141"